عوام جماعت اسلامی کا ساتھ دے ، ہمارے پاس اسلامی نظام ہے ، سراج الحق

(قدرت روزنامہ)امیر جماعت اسلامی سراج الحق نے کہا ہے کہ عوام جماعت اسلامی کا ساتھ دے کیوں کے ہمارے پاس اسلامی نظام ہے۔

تفصیلات کے مطابق امیر جماعت اسلامی سراج الحق نے پریس کانفرنس کرتے ہوئے کہا ہے کہ اسلام آباد میں ادارے باہم دست و گریباں ہیں ، افغانستان کے معاملے پر عالمی طاقتیں ہٹ دھرمی سے کام کر رہی ہیں۔

انہوں نے کہا کہ کراچی سے چترال تک کے لوگ مایوس ہو چکے ہیں ، حکومت نے بہت سے وعدے کیے لیکن ایک وعدہ بھی پورا نہیں کر سکی ، موجودہ حکومت سابق حکومتوں کے گند صاف کرنے کی بات کر رہی ہے ، ہر آنے والی حکومت آتی ہے اور گند ڈال کر چلی جاتی ہے۔

امیر جماعت اسلامی سراج الحق نے کہا ہے کہ پی ٹی آئی حکومت عدالتوں، ایوان اور الیکشن کمیشن کو اپنی مٹھی میں رکھنا چاہتی ہے ، یہ آرڈیننس کے ذریعے اپنے کام نکلوا رہے ہیں ، ہر بار نیا قانون لایا جاتا ہے ، خارجہ پالیسی مکمل طور پر ناکام ہو چکی ہے ، پاکستان دنیا میں تنہا رہ گیا ہے ، کشمیر کو ہندوستان نے ہڑپ کر لیا ، کشمیر کی قوم کو انہوں نے جیل خانوں میں بند کر رکھا ہے۔

سراج الحق نے کہا ہے کہ پی ٹی آئی ، ن لیگ اور پی پی پی میں کوئی فرق نہیں ، عوام نے آزادی کے لئے جدو جہد کی لیکن حکمران اسی نظام کو مسلط کیے ہوئے ہیں ، چہرے تبدیل ہو رہے ہیں۔ ،معاشرے میں انصاف نام کی کوئی چیز نہیں ہے ، ملک میں سفارش اور کرپشن کا چرچہ ہے ، عالمی ادارے کرپشن کا بتا رہے ہیں ، پوری دنیا نے افغانستان کا معاشی محاصرہ کر رکھا ہے۔

انہوں نے کہا کہ افغانستان میں جائز عوامی حکومت کو دنیا تسلیم نہیں کر رہی ، عالمی ادارے کہہ رہے ہیں کہ وہاں قحط اور بھوک پھیل رہی ہے لیکن بین الاقوامی انسانی حقوق کی بات کرنے والے چاہتے ہیں افغان عوام بھوک سے مرے ، پاکستانی حکومت بھی ان کے ساتھ اچھا سلوک نہیں کر رہی ، طورخم اور چمن بارڈر بند کرکے وہاں کی عوام کے دلوں میں نفرت پھیلائی جا رہی ہے۔

امیر جماعت اسلامی سراج الحق نے کہا ہے کہ حکومت فوری طور پر تمام بارڈر کھولے اور افغانستان کے حالات بہتر کرنے میں مدد کرے ، حکومت پی آئی اے کے افغانستان سے پاکستان تک کا کرایہ کم کرے ، اسلام آباد میں گونگے بہرے لوگ بیٹھے ہیں جو من پسند فیصلے کرتے ہیں ، عوام جماعت اسلامی کا ساتھ دے ، ہمارے پاس اسلامی نظام ہے۔