راولپنڈی؛ پی ٹی آئی کے عہدیدارغیرقانونی حراست سے بازیاب،ایس ایچ او کیخلاف مقدمہ

راولپنڈی(قدرت روزنامہ)عدالتی بیلف نے تھانہ سول لائن میں چھاپہ مار کر غیرقانونی حراست میں رکھے گئے تحریک انصاف کے دو کارکنان کو بازیاب کرالیا، عدالت نے غیر قانونی گرفتاری پر ایس ایچ او تھانہ سول لائن اور تفتیشی افسر خلاف مقدمہ درج کرنے کا حکم دے دیا۔
پی ٹی آئی کے ڈسٹرکٹ سیکرٹری اطلاعات راجہ عثمان اور نائب صدر ملک فیصل کے اہل خانہ نے ایڈیشنل سیشن جج کی عدالت میں درخواست دائر کی تھی کہ تھانہ سول لائن میں مذکورہ دونوں افراد کو بغیر کسی مقدمے کے غیرقانونی حراست میں رکھا گیا ہے، بازیاب کرایا جائے۔
درخواست کی سماعت کے بعد ایڈیشنل ڈسٹرکٹ اینڈ سیشن جج فرحت جبین نے بیلف مقرر کر کے چھاپے کا حکم دیا، عدالتی بیلف نے پولیس ریکارڈ چیک کیا تو دونوں کی کسی مقدمے میں گرفتاری نہیں تھی۔
عدالتی بیلف نے دونوں افراد کو پولیس حراست سے اپنی تحویل میں لے لیا جنہیں بعدازاں عدالت میں پیش کردیا گیا۔
عدالت نے پی ٹی آئی کے عہدیداران کی غیر قانونی گرفتاری پر ایس ایچ او تھانہ سول لائن اور تفتیشی افسر خلاف مقدمہ درج کرنے کا حکم دیتے ہوئے سٹی پولیس افسر کو مقدمہ درج کر کے عدالت رپورٹ پیش کرنے کا حکم جاری کیا۔ عدالت نے تھانہ سول لائن پولیس کی غیر مشروط معافی کی استدعا بھی مسترد کردی۔
تحریک انصاف کے غیر قانونی حراست سے بازیاب دونوں عہدیداران کو آزاد کردیا گیا اور عدالت نے دونوں کارکنوں کی دوبارہ گرفتاری صورت میں بھی سخت وارننگ جاری کرتے ہوئے کہا کہ اختیارات کے غیر قانونی استعمال کی اجازت نہیں دی جاسکتی۔ انہوں نے کہا کہ پولیس قانون آئین میں دیے گئے اختیارات اور قواعد کی پابند ہے۔