میڈیکل کالجز کی فیسوں میں اضافے کو مسترد کرتےہیں،بی ایس او

کوئٹہ (قدرت روزنامہ)بی ایم سی یونٹ کی جانب سے بولان یونیورسٹی آف میڈیکل اینڈ ہیلتھ سائنسز کے تحت میڈیکل کالجز کی مختلف فیسوں، بشمول امتحانی فیس، ڈی ایم سی فیس، اور دیگر غیر ضروری چارجز میں من مرضی اضافے کو مکمل طور پر مسترد کرتی ہے۔ یہ اقدامات بلوچستان جیسے غریب صوبے کے طلبا کے ساتھ انتہائی ناانصافی ہیں، اور انہیں تعلیم کے حق سے محروم رکھنے کے مترادف ہیں۔بی ایس او بی ایم سی یونٹ نے سخت الفاظ میں اس فیصلے کی مذمت کرتے ہوئے کہا کہ ایسے ظالمانہ اقدامات کا مقصد طلبا کو مالی بوجھ تلے دبا کر تعلیمی میدان سے دور رکھنا ہے۔ امتحانی فیس، ڈی ایم سی فیس، اور سرٹیفکیٹ فیس میں یہ بے جا اضافے تعلیم حاصل کرنے کی راہ میں ایک بڑی رکاوٹ بن رہے ہیں، جس سے طالب علموں کو مزید مشکلات کا سامنا کرنا پڑے گا۔بی ایس او بی ایم سی یونٹ نے یونیورسٹی انتظامیہ سے مطالبہ کیا ہے کہ وہ فوری طور پر اس غیر منطقی اضافے کو واپس لے ورنہ طلبا احتجاجی تحریک چلانے پر مجبور ہوں گے، اور اس کے نتائج کی ذمہ داری یونیورسٹی انتظامیہ پر ہوگی۔بلوچستان کے طلبا کے تعلیمی حقوق کو پامال کرنے کی یہ سازش کسی صورت قبول نہیں کی جائے گی۔