سعدیہ امام کو شوبز انڈسٹری میں کام کرنے سے کس نے اور کیوں روکا؟

اسلام آباد (قدرت روزنامہ)پاکستان کی سینیئر اداکارہ و ٹی وی میزبان سعدیہ امام نے اعتراف کیا ہے کہ شادی کے بعد شوہر نے انہیں ڈرامہ انڈسٹری میں کام کرنے سے روک دیا تھا۔
حال ہی میں سعدیہ امام نے نجی ٹی وی چینل کے ایک مارننگ شو میں شرکت کی جس کا ویڈیو کلپ سوشل میڈیا پر وائرل ہو رہا ہے، ویڈیو میں اداکارہ و میزبان شادی سے پہلے اور بعد میں خواتین کو درپیش مسائل پر بات کررہی ہیں۔
اداکارہ نے کہا کہ لڑکیاں شادی کے بعد کام چھوڑ دیتی ہیں، ماں باپ اتنا پیسہ لگا کر پڑھاتے ہیں لیکن شوہر کام نہیں کرنے دیتے، انہوں نے مزید کہا کہ جیسے ان کے شوہر نے انہیں بطوراداکارہ پسند کیا تھا لیکن شادی کے بعد انہوں نے کام کرنے سے روک دیا کیونکہ شوہر کی انا کا مسئلہ تھا۔
اداکارہ نے پروگرام میں بات کرتے ہوئے مزید کہا کہ ماضی میں مائیں اپنی بیٹیوں کی اچھی تربیت کرتی تھیں لیکن اب ایسا نہیں ہوتا۔ انہوں نے بتایا کہ معروف اداکارہ ہونے کے باوجود والدہ انہیں رشتے داروں کی شادیوں میں جانے کا دباؤ ڈالتی تھیں اور وہ نہ چاہتے ہوئے بھی رشتے داروں کی تقریبات میں شرکت کرتی تھیں لیکن ایسی تربیت آج کل کی نسل میں نظر نہیں آتی۔
اداکارہ کا کہنا تھا کہ والدین نے رشتے داروں کی تقریبات میں لازمی جانے کی عادت ڈالی جو کہ آج بھی ان میں موجود ہے اور اب تک وہ اپنے رشتے داروں کی تقریبات میں شرکت کرتی ہیں، جس سے ان کے تعلقات مضبوط ہونے سمیت ان کی تربیت کا پتا چلتا ہے۔
واضح رہے کہ سعدیہ امام نے 2012 میں پاکستانی نژاد جرمنی کے صنعت کار عدنان حیدر سے شادی کی تھی اور ان سے ایک بیٹی بھی ہے۔ شادی کے بعد سعدیہ امام طویل عرصے تک شوبز سے دور تھیں تاہم چند سال سے وہ ٹی وی پروگرامز میں دکھائی دیتی ہیں۔
سال 2020 میں سعدیہ امام نے ایک انٹرویو کے دوران شوبز چھوڑنے کی خبروں کو جھوٹا قرار دیتے ہوئے دعویٰ کیا تھا کہ شوہر نے انہیں روکا اور نہ ہی انہوں نے شوبز کو چھوڑا ہے۔