مہاجر پرندے ہماری زمینوں کی زرخیزی میں مددگار ثابت ہوتے ہیں،:وزیر اعلیٰ پنجاب کا عالمی دن پر پیغام

لاہور(قدرت روزنامہ )وزیر اعلیٰ پنجاب مریم نواز نے مہاجر پرندوں (Migrant Birds)کے عالمی دن پر اپنے پیغام میں کہا ہے کہ مہاجر پرندے قدرت کا انمول تحفہ ہیں۔ دور دیسوں سے آنے والے مہاجر پرندے فطرت کی خوبصورتی بڑھاتے ہیں۔ مہاجر پرندے ماحولیات کے توازن کو برقرار رکھنے میں اہم کردار ادا کرتے ہیں۔
وزیر اعلیٰ مریم نوازنے کہا کہ مہاجر پرندے ہماری زمینوں کی زرخیزی میں مددگار ثابت ہوتے ہیں۔ مہاجر پرندوں کی حفاظت کے لئے قدرتی ماحول کا تحفظ ضروری ہے۔ قدرتی اور قیمتی اثاثہ کی حفاظت کے لئے پنجاب میں وائلڈ لائف فورس کا قیام عمل میں لایا جا رہا ہے۔ غیر قانونی شکار کرنے والوں کے خلاف کریک ڈاؤن کیا جارہا ہے۔

وزیر اعلیٰ مریم نواز نے کہا کہ پنجاب حکومت مہاجر پرندوں کے محفوظ مسکن اور جنگلات کی بقاء کے لیے ممکنہ وسائل بروئے کار لا رہی ہے۔ جنگلی حیات کو درپیش چیلنجز سے نمٹنے کے لئے ماحول دوست اقدامات کررہے ہیں۔ ذمہ دار شہری بن کر ہمیں مہاجر پرندوں اور دیگر جنگلی حیات کی بقاء کے لیے اپنا کردار ادا کرنا ہے۔ پرندے فطرت کا حسین ورثہ ہیں، حفاظت ہم سب کا فرض ہے۔