ایس سی او کانفرنس کے موقع پر پی ٹی آئی کا ڈی چوک میں احتجاج کا اعلان سازش ہے، فیصل کریم کنڈی

اسلام آباد (قدرت روزنامہ)گورنرخیبرپختونخوا فیصل کریم کنڈی نے کہا ہے کہ پی ٹی آئی کا ہمیشہ ملک کے خلاف ایجنڈا رہا ہے، ایس سی او کانفرنس کے موقع پر پی ٹی آئی کا ڈی چوک میں احتجاج کا اعلان سازش ہے۔
ہفتے کے روز اسلام آباد میں میڈیا نمائندوں سے گفتگو میں گورنر خیبرپختونخوا فیصل کنڈی نے کہا کہ پی ٹی آئی والے ملک دشمنوں کے ساتھ کام کررہے ہیں، ہم پاکستان کو عدم استحکام کا شکار کرنے کی سازش کامیاب نہیں ہونے دیں گے،پی ٹی آئی 15 اکتوبر کے احتجاج کی کال واپس لے، ایس سی او کانفرنس کے دوران ڈی چوک میں احتجاج کا اعلان ملک کے خلاف سازش ہے۔
فیصل کریم کنڈی نے کہا کہ اس ملک میں جو کچھ ہورہا ہے سب کے سامنے ہے، پاکستان میں بہت عرصے بعد ایک اہم ترین انٹرنیشنل کانفرنس ہورہی ہے ، ہم پاکستان کا مثبت تشخص کودنیا کو دکھانا چاہتے ہیں اور پی ٹی آئی نے کانفرنس والے دن احتجاج کی کال دی ہے، اسرائیلی اخبارات عمران خان کے حق میں آرٹیکل لکھ رہے ہیں۔
انہوں نے سوال اٹھایا کہ کیا ڈی چوک میں احتجاج کرنے سے بانی پی ٹی آئی رہا ہوجائیں گے؟ کیا ڈی چوک میں احتجاج کرنے سے نمبر پورے ہونے پر آئینی ترمیم نہیں ہوگی؟
گورنر خیبرپختونخوا نے کہا کہ اگر پی ٹی آئی کے مطالبات آئین کے مطابق ہیں تو ضرور سنے جائیں گے، اس وقت تمام سیاسی جماعتیں ایس سی او کانفرنس پر ایک ہیں، ہم ون پوائنٹ ایجنڈے پر کاربند ہیں، پہلے پاکستان ہے پھر بعد میں کسی کی سیاست، تاہم پی ٹی آئی کا ایجنڈا تھا کہ وہ انڈیا کے وزیر کو لاکر دھرنے سے خطاب کروائیں گے۔
انہوں نے کہا کہ پیپلز پارٹی نے ملک کے لیے بہت قربانیاں دی ہیں، ہم سے زیادہ قیادت اور ورکرز کی قربانی کسی دوسری پارٹی نے نہیں دی لیکن پھر بھی ہم نے ملک کے خلاف نعرہ نہیں لگایا بلکہ پاکستان کھپے کا نعرہ لگایا ہے۔
فیصل کریم کنڈی نے کہا کہ سیاست دانوں کا سب سے بہترین فورم پارلیمنٹ ہے، یہ لوگ دوسروں کے بچوں کومروانے کے چکر میں ہیں، خود بھی سڑکوں پر نکلیں اور احتجاج کریں، یہ وہ لوگ ہیں جو پاکستان کو ترقی کرتے ہوئے نہیں دیکھ سکتے ، احتجاج آپکا حق ہے لیکن یہ موقع ٹھیک نہیں ہے۔
ان کا کہنا تھا کہ مولانا فضل الرحمان ایک سیاسی شخصیت ہیں جنہوں نے جمہوریت کے لیے جدوجہد کی، ان کا ووٹ ہمارے حق میں ہوگا۔