گجنی 2 کی ہندی اور تامل میں شوٹنگ ایک ساتھ ہوگی

عامر خان اور سوریہ دونوں ہی فلم کے ری میک کے طور پر کرنے کے حق میں نہیں ہیں
ممبئی(قدرت روزنامہ)بھارتی فلمساز ایلو اروند نے بالی ووڈ کی سپرہٹ فلم ’’گجنی‘‘ کے سیکوئیل کا اشارہ دے دیا۔
ایلو اروند نے بالی ووڈ کے سپر اسٹار عامر خان کی مشہور فلم گجنی کے سیکوئیل کا ہندی اور تامل زبان میں ایک ساتھ شوٹنگ کا اظہار کیا ہے۔
فلمساز کا کہنا ہے کہ ’’گجنی 2‘‘ کو ایک ہی وقت میں ہندی اور تامل دونوں زبانوں میں بنایا جائے گا اور دونوں فلمیں ایک ساتھ ریلیز ہوں گی۔ اداکار عامر خان اور سوریہ مبینہ طور پر اسکرپٹ کو حتمی شکل دینے کےلیے پروڈیوسر ایلو اروند سے بات چیت کررہے ہیں۔
بھارتی میڈیا کے مطابق اداکار عامر خان اور تامل فلموں کے ہیرو سوریہ کو اپنی ہٹ فلم گجنی 2 کا آئیڈیا پسند آیا ہے اور دونوں ہی اداکار فلم کے سیکوئیل میں کام کرنے کےلیے راضی ہوگئے ہیں۔ فلمساز ایلو اروند کا ارادہ ہے کہ فلم کے ہندی اور تامل ورژن کی شوٹنگ ایک ہی وقت میں شروع کی جائے۔
بھارتی میڈیا کی رپورٹ میں پروڈکشن کے قریبی ذرائع کے حوالے سے بتایا گیا ہے کہ عامر خان بھی گجنی 2 کی تیاری کے حوالے سے کچھ عرصے سے ایلو اروند کے ساتھ کام کررہے ہیں۔ اداکار فلم کے تامل ورژن کے ری میک پر کام کرنے کے بجائے تازہ اسکرپٹ کے طور پر کام کرنے کے خواہشمند ہیں۔
عامر خان اور سوریہ دونوں ہی کسی فلم کے ری میک کے طور پر کام کرنے کے حق میں نہیں ہیں۔ کیونکہ وہ نہیں چاہتے کہ ان پر ری میک کا ٹیگ لگ جائے۔ اس لیے ایلو اروند اور مدھو منتینا نے دونوں زبانوں میں گجنی 2 کی ایک ساتھ شوٹنگ کا حل نکالا ہے۔ جس کے لیے ایک ہی شیڈول اور ایک ساتھ بڑی اسکرین پر پیش کرنے پر بات چیت کی جارہی ہے۔
فلمساز کے مطابق اگر سب کچھ منصوبے کے مطابق ہوتا ہے تو گجنی 2 کا خاکہ 2025 کے وسط تک مکمل ہوجائے گا۔ عامر خان اور سوریہ دونوں نے ہی ابتدائی طور پر حامی بھرلی ہے اور اب سب کچھ فائنل اسکرپٹ پر منحصر ہے۔
گجنی فلم کا تامل ورژن 2005 میں ریلیز ہوا تھا، جس میں سوریہ اور آسین نے اداکاری کی تھی، جبکہ 2008 میں عامر خان کی فلم گجنی کا ہندی ورژن پردۂ اسکرین پر سامنے آیا تھا جس نے باکس آفس پر بے پناہ کامیابی حاصل کی تھی۔