آزادی کی صبح ضرور طلوع ہوگی ، کشمیریوں کی قربانیاں رائیگاں نہیں جائیں گی:حنا پرویز بٹ

لاہور (قدرت روزنامہ ) چیئرپرسن پنجاب ویمن پروٹیکشن اتھارٹی حنا پرویز بٹ نے کہا ہے کہ دنیا بھر میں کشمیری عوام آج 27 اکتوبر کو بھارت کے زیرِ تسلط جموں و کشمیر پر قبضے کے خلاف یومِ سیاہ منا رہے ہیں۔ پاکستانی عوام کشمیریوں کی جدوجہد میں ان کے ساتھ ہیں اور ان کے حق خود ارادیت کے لیے اپنی آواز بلند کر رہے ہیں۔
حنا پرویز بٹ نے مزید کہا کہ جموں و کشمیر کے عوام نے کبھی بھی کسی غاصبانہ حکمرانی کو قبول نہیں کیا، چاہے وہ ڈوگرہ راج ہو یا بھارتی قبضہ۔ انہوں نے اس بات کا عزم ظاہر کیا کہ پاکستان کشمیریوں کی سفارتی اور اخلاقی حمایت جاری رکھے گا اور عالمی برادری سے مطالبہ کیا کہ کشمیریوں اقوام متحدہ کی قراردادوں کے مطابق حقِ خود ارادیت دیا جائے۔

انہوں نے امید ظاہر کرتے ہوئے کہا کہ “کشمیریوں کی آزادی کی صبح ضرور طلوع ہوگی اور ان کی قربانیاں رائیگاں نہیں جائیں گی”۔