عاطف خان کے الزامات پر وزیراعلیٰ خیبرپختونخوا کا آڈیو پیغام بھی سامنے آگیا

اسلام آباد (قدرت روزنامہ)خیبرپختونخوا کے محکمہ اینٹی کرپشن کی جانب سے نوٹس بھیجے جانے کے معاملے پر سابق صوبائی وزیر و رکن قومی اسمبلی عاطف کے مبینہ آڈیو پیغام پر وزیراعلیٰ خیبرپختونخوا علی امین گنڈاپور کا آڈیو پیغام بھی سامنے آگیا ہے۔
سوشل میڈیا پر جاری کردہ آڈیو پیغام میں وزیراعلیٰ علی امین گنڈاپور نے سابق صوبائی وزیر عاطف خان کو مخاطب کرتے ہوئے کہا کہ آپ جو بیانات دے رہے ہیں اور جس قسم کی باتیں کررہے ہیں وہ میں سن رہا ہوں، آپ پہلے معاملات کی تصدیق کرلیا کریں، میں اتنا فارغ بھی نہیں ہوں، میرے اوپر بڑی ذمہ داریاں ہیں جنہیں میں نبھا رہا ہوں۔
انہوں نے کہا کہ آپ حیثیت کی بات کررہے ہیں، آپ اس طرح کی باتیں نہ کریں، آپ کے منہ سے ایسی باتیں اچھی نہیں لگتیں، ہم سارے آپس میں بھائی ہیں، آپ حیثیت کے چکر میں پڑیں گے تو پھر ہمیں آپ کی حیثیت کا اچھی طرح معلوم ہے۔
علی امین گنڈاپور نے کہا کہ آپ دھمکیوں اور بدمعاشی سے نہ کوئی ڈرتا ہے اور نہ ہی کوئی مانتا ہے، آپ اتنے اہم فرد نہیں کہ میں جس کے پیچھے پھرتا رہوں، آپ اعظم خان، پرویز خٹک اور محمود خان کے ساتھ نیب سے متعلق جو کہانی سنا رہے، آپ کے خلاف یہ انکوائری اور کیسز میں کھلی ہے، آپ نے 4 ماہ پہلے اسی گروپ میں میسج کیا تھا کہ ہماری انکوائریوں کا کیا ہوگا۔
وزیراعلیٰ خیبرپختونخوا نے عاطف خان کو مشورہ دیا کہ انکوائری سے بچنے کے لیے آپ کو پیش ہونا ہوگا اور اپنا نام کلیئر کرانا ہوگا ورنہ یہ فائلیں اسی طرح پڑی رہیں گی جنہیں بعد میں کوئی اور کھول لے گا، یہ آپ کو صرف اس لیے بھیجا گیا ہے کہ آپ آئیں اور جواب دیں اس کا، یہ وہ کہانی نہیں جو آپ سنا رہے ہیں، یہ کوئی اور کہانی ہے جس پر آپ کو طلب کیا گیا ہے۔
انہوں نے کہا کہ چیزوں کو الٹ پلٹ کرکے خود سے کہانیاں گھڑنا اور کہنا کہ مجھے معلوم ہے کہ یہ کس نے کیا ہے اور میسج میں میرا نام لکھ کر کہنا کہ یہ اپنی حیثیت دکھا رہا ہے، مہربانی کرکے اس طرح کی باتوں سے گریز کریں، میں پہلے ہی آپ کو برداشت کررہا ہوں، آپ نے میڈیا پر آکر پہلے بھی ڈراما بنایا اور اب بھی بنا رہے ہیں، میں اتنا فارغ نہیں اور نہ آپ اتنے اہم ہیں کہ میں آپ کے خلاف اس طرح کی چیزیں نکالتا پھروں۔
واضح رہے کہ خیبرپختونخوا کے محکمہ اینٹی کرپشن نے یکم نومبر کو بذریعہ نوٹس عاطف خان کو مالم جبہ اراضی اسکینڈل میں طلب کیا تھا۔ عاطف خان نے نوٹس بھجوائے جانے پر کہا تھا کہ سب جانتے ہیں اینٹی کرپشن کا نوٹس کیوں اور کس کے کہنے پر آیا ہے۔ یہ سمجھتے ہیں کہ اس طرح کی حرکت کرنے پر میں چپ بیٹھوں گا تو ایسا نہیں ہے، پارٹی کا نقصان عمران خان کا نقصان ہے۔
سوشل میڈیا پر جاری کردہ مبینہ آڈیو پیغام میں بات کرتے ہوئے عاطف خان نے کہا کہ سب جانتے ہیں کہ اینٹی کرپشن کا نوٹس کیوں آیا ہے، ان چیزوں سے فرق نہیں پڑتا، اس سے بڑی بڑی چیزوں سے نکل آئے ہیں۔ یہ کام کرنے والے اپنی حیثیت اور سوچ دکھا دیتے ہیں۔
عاطف خان نے کہا تھا کہ اس سے پہلے بھی نیب نے انکوائری کی تھی اور بند کردی تھی، 2014 میں پرویز خٹک چیف منسٹر تھے اور محمود خان ٹورازم کے منسٹر تھے میں اس وقت نا منسٹر تھا اور نہ کوئی اور عہدا تھا۔
انہوں نے کہا کہ ’سینیٹر محسن عزیز نے یہ پراسس کروایا تھا وہ اس وقت بورڈ آف انوسیٹمنٹ کو ہیڈ کررہے تھے اور اعظم خان اس وقت سیکرٹری ٹورازم تھے‘۔