محمد رضوان کی کپتانی میں کیا چیز منفرد ہے؟ شاہین شاہ آفریدی نے بتادیا

اسلام آباد (قدرت روزنامہ)فاسٹ بولر شاہین شاہ آفریدی نے محمد رضوان کی کپتانی سے متعلق بتایا کہ وہ ایک نڈر کھلاڑی ہیں، خود بھی جارحانہ کھیلتے ہیں اور ہمیں بھی جارحانہ کھیلنے کی ہدایت کرتے ہیں۔ محمد رضوان کھلاڑیوں کی حوصلہ افزائی کرتے ہیں اور ان کا ساتھ دیتے ہیں۔
شاہین شاہ آفریدی نے نیوز کانفرنس کے دوران صحافیوں کے سوالوں کے جواب دیتے ہوئے کہا کہ آسٹریلیا میں پریکٹس کریں اور کچھ زیادہ نہیں بس ٹارگٹ کی گئی جگہوں کو نشانہ بنائیں تو وکٹ مل جاتی ہے۔
ان کا کہنا تھا کہ سب نے نئے کپتان کی قیادت میں خوب محنت کی جو گراؤنڈ میں نظر بھی آئی، جس کا نتیجہ ہمیں سیریز جیتنے پر ملا۔ محمد رضوان بہترین کپتان ہیں، انہوں نے ہمیں بھی اٹیکنگ کرکٹ کھیلنے کا کہا۔
محمد رضوان کھلاڑیوں کی حوصلہ افزائی کرتے ہیں اور ان کا ساتھ دیتے ہیں‘۔
فاسٹ بولر کا کہنا تھا کہ کپتان نے تمام بولرز کو فری ہینڈ دیا اور کہا کہ بس اٹیک کرو، ہمیں پہلے سے معلوم تھا کہ آسٹریلیا میں پچز باؤنسی ہیں اس لیے ہم نے اس کے مطابق جارحانہ بولنگ کی اور ہمیں رزلٹ ملا۔
انہوں نے کہا کہ بولرز کو چاہیے ہوتا ہے وہی کیا، پراسس کو فالو کیا اور بس یہ کوشش کی کہ ان گراؤنڈز میں کہاں اور کیسے بولنگ کرنی ہے، نتیجہ خود ملتا رہا۔