حکومت مہنگائی کے مسئلے سے نمٹنے کے لیے ہمہ جہت ہے، فواد چوہدری
فواد چوہدری نے بریفنگ دیتے ہوئے کہا کہ وزیراعظم نے پارٹی لیڈر شپ کو عوامی رابطہ مہم شروع کرنے کی ہدایت دی ہے اور ساتھ وزیراعظم نے کہا ہے کہ مقامی حکومتوں کے انتخابات کی تیاری کے لیے شہروں اور اضلاع میں شیڈول جاری کیے جائیں . وزیراعظم نے متوسط طبقے کو ریلیف کی فراہمی کے لیے فوری اقدامات کی ہدایت کی اور احساس پروگرام کی سبسڈی اسکیم کو بڑھانے کی بھی ہدایت کی ہے . وفاقی وزیر اطلاعات نے پاکستان تحریک انصاف کی کور کمیٹی کے اجلاس کے بعد بریفنگ دیتے ہوئے کہا کہ وزیراعظم آنے والے دنوں میں بڑے پروگراموں کا اعلان کریں گے . وفاقی وزیر اطلاعات نے کہا کہ کور کمیٹی کے اجلاس سے پہلے وزیراعظم نے احساس پروگرام کے حوالے سے اجلاس کی صدارت کی . فواد چوہدری کا کہنا تھا کہ خیبر پختونخوا اور پنجاب احساس پروگرام کی سبسڈی اسکیم میں حصہ دار بننے کو تیار ہیں اور گلگت بلتستان اور کشمیر نے اس میں دلچسپی کا اظہار کیا ہے . ہم چاہتے ہیں کہ سندھ اور بلوچستان بھی اس سبسڈی اسکیم میں حصہ دار بنیں . ان کا کہنا تھا کہ سندھ حکومت کی جانب سے گندم کے اجراء میں مسلسل تاخیر کے باعث سندھ میں 20 کلو آٹے کا تھیلا پنجاب اور خیبر پختونخوا کی نسبت 400 روپے زیادہ مہنگا ہے، ہم سندھ حکومت پر مسلسل زور دے رہے ہیں کہ گندم کی ریلیز کو بڑھایا جائے تاکہ سندھ میں آٹے کی قیمت میں کمی ہو . انہوں نے یہ بھی کہا کہ اس سال گنے کی تاریخی پیداوار ہونے کی توقع ہے . کاٹن کی پیداوار گزشتہ سال کی نسبت 60 فیصد زیادہ ہے . آٹے کی قیمت میں مسلسل کمی دیکھی جا رہی ہے . کرشنگ سیزن شروع ہو گا تو چینی کی قیمت مزید کم ہو گی . فواد چوہدری کا کہنا تھا کہ دالوں، سبزیوں، چینی اور آٹے کی قیمتوں میں کمی کا رجحان ہے، اگر یہ رجحان برقرار رہا تو پٹرولیم مصنوعات کی قیمتوں میں اضافے کی وجہ سے عوام کو درپیش مشکلات میں کچھ ریلیف ملے گا . حکومت مہنگائی کے مسئلے سے نمٹنے کے لیے ہمہ جہت ہے . فواد چوہردی نے مزید کہا کہ اجلاس میں مشیر خزانہ شوکت ترین نے بذریعہ زوم جبکہ احساس پروگرام کی چیئرپرسن ثانیہ نشتر، پنجاب اور خیبر پختونخوا کے وزراء خزانہ سمیت چیف سیکریٹریز اور سینئر بیورو کریٹس نے شرکت کی . . .
