’یہ حسد کر رہی ہیں‘، نادیہ خان صارفین کے نشانے پر کیوں؟

اسلام آباد (قدرت روزنامہ)پاکستان شوبز انڈسٹری کی معروف میزبان و اداکارہ نادیہ خان جو ان دنوں اپنے بیانات کی وجہ سے سرخیوں میں ہیں حال ہی میں انہوں نے اداکارہ حریم فاروق کا مذاق اڑایا ہے۔
اپنے شو ’کیا ڈرامہ ہے‘ میں انہوں نے حریم فاروق کی اداکاری کی نقل اتارتے ہوئے ان کا مذاق اڑایا اور کہا کہ ڈائیلاگ بولتے ہوئے حریم کی آواز اور لائنیں بہت عجیب تھیں۔ انہوں نے کہا کہ لگتا ہے الکوحل کی بوتلیں معصومہ (حریم فاروق) کے پاس چلی گئی تھیں اس لیے انہوں نے ایسی اداکاری کی۔
انہوں نے سینیئر اداکار شاہین خان جو معصومہ کی والدہ کا کردار ادا کر رہی ہیں ان کے کردار کا بھی مذاق اڑاتے ہوئے کہا کہ انہیں صرف مردوں کے بارے میں ڈائیلاگ دیے گئے ہیں کہ مرد کیسا ہے اور ایسا لگتا ہے شاہین خان نے مردوں پر پی ایچ ڈی کر رکھی ہے۔
مرینہ خان اور عتیقہ اوڈھو اس وقت خاموش تھیں جب نادیہ خان اداکارہ حریم فاروق اور ڈرامے کی دیگر کاسٹ کے بارے میں اپنا تجزیہ دے رہی تھیں۔ ان دونوں نے کسی قسم کی رائے دینے سے گریز کیا۔
نادیہ خان کا یہ کلپ سوشل میڈیا پر وائرل ہوا تو صارفین کی جانب سے اس پر مختلف تبصرے کیے گئے ایک صارف کا کہنا تھا کہ نادیہ خان اوور ایکٹنگ کی دکان ہیں انہیں ایکٹنگ کے بارے میں کچھ نہیں پتا اور وہ دوسروں پر تنقید کرتی ہیں۔ ایک سوشل میڈیا صارف نے لکھا کہ نادیہ خان کے تبصروں سے مرینہ اور عتیقہ اوڈھو بھی پریشان رہتی ہیں۔
جہاں کئی صارفین نے نادیہ خان کو تنقید کا نشانہ بنایا وہیں چند صارفین ان کے تجزیے سے متفق نظر آئے ایک صارف کا کہنا تھا کہ حریم کی اداکاری نے ڈرامے کو ڈاؤن کر دیا ہے۔
جبکہ ایک صارف نے کہا کہ اس شو کے بارے میں رپورٹ کرنی چاہیے۔ نادیہ خان کسی بھی اداکارہ کے لیے ایسی باتیں کس طرح کہہ سکتی ہیں، صارف کا مزید کہنا تھا کہ نادیہ خان حسد کر رہی ہیں، ہمارے ملک میں ڈرامہ انڈسٹری اچھی چل رہی ہے وہ کیوں اسے برباد کرنے کی کوشش کر رہی ہیں ان کا کہنا تھا کہ یہ تنقید نہیں ہے۔
بہت سے لوگوں کا خیال تھا کہ نادیہ خان کسی بھی شو کے لیے ایک اچھی انٹرٹینر ہوسکتی ہیں لیکن وہ پروفیشنل ڈرامہ ریویو نہیں دے سکتیں۔