پنجاب میں گندم پیسنے والی دیسی چکیوں کو بھی سرکاری گندم فراہم کرنے کا فیصلہ کرلیا گیا تاکہ ۔ ۔ ۔
ایکسپریس نیوز کے مطابق محکمہ خوراک پنجاب نے صوبے کے تمام ڈپٹی کمشنرز کو سرکلر جاری کردیا ہے جس میں کہا گیا ہے کہ فوڈ گرین لائسنس رکھنے والی آٹا چکی کو یومیہ 5 بوری سرکاری گندم کوٹہ دیا جائے، تمام ڈپٹی کمشنرز اپنے اضلاع میں موجود لائسنس یافتہ چکیوں کو سرکاری کوٹے کی فراہمی اور آٹا کی فروخت کے حوالے سے مانیٹرنگ سسٹم وضع کریں گے . اس وقت محکمہ خوراک کے پاس مجموعی طور پر 846 آٹا چکیاں رجسٹرڈ ہیں . سب سے زیادہ لائسنس یافتہ آٹا چکیاں لاہور ڈویژن میں موجود ہیں جن کی تعداد 300 ہے جبکہ ملتان ڈویژن میں 242 چکیاں موجود ہیں . علاوہ ازیں محکمہ خوراک نے غیر فعال فلورملز کی انسپکشن کے ایس او پیز بھی جاری کر دیئے ہیں ، اس وقت پنجاب میں ڈیڑھ سو کے لگ بھگ فلورملز غیر فعال قرار دی گئی ہیں . نوٹیفیکیشن کے مطابق غیر فعال فلورملز محکمہ خوراک سے گندم کوٹہ لینے کیلئے اپنی درخواست کے ہمراہ مئی، جون،جولائی، اگست (چار ماہ) کے بجلی کے بل، ان چار ماہ میں نجی گندم کی پسائی کا ڈیٹا فراہم کرنے کے علاوہ فوڈ گرین لائسنس، مشینری کی تفصیلات فراہم کرنے کی پابند ہوں گی . رپورٹ کے مطابق سرکاری کوٹہ لینے کی اہل ہونے کیلئے مل انتظامیہ کو مذکورہ چار ماہ میں مجموعی طور پر 200 ٹن نجی گندم کی پسائی ثابت کرنا ہو گی جس کی تصدیق بجلی کے بلز سے ہونا لازم ہوگا . مذکورہ چار مہینوں کی گندم پسائی اور مارکیٹ سپلائی کی تصدیق محکمہ خوراک کے ”فلورلیجر مینجمنٹ انفارمیشن سسٹم“ سے ہونا لازم ہوگا تاہم اگر مل کی گرائنڈنگ کی تصدیق بجلی بل سے ہوتی ہے لیکن سافٹ ویئر میں ڈیٹا کی فیڈنگ میں کوئی کمی ہے تو پھر فلورملز کو 50 ہزار تا1 لاکھ روپے تک جرمانہ عائد کر کے سرکاری کوٹہ جاری کردیا جائے گا . . .
