گورننس کی بہتری کیلئے ماہرین کی رائے سے مثبت نتائج سامنے آئیں گے: وزیراعظم

اسلام آباد( قدرت روزنامہ )وزیر اعظم محمد شہباز شریف کا کہنا ہے کہ گورننس کی بہتری کیلئے ماہرین کی رائے سے مثبت نتائج سامنے آئیں گے۔
نجی ٹی وی دنیا نیوز کے مطابق وزیرِاعظم کے ادارہ جاتی اصلاحات کے ایجنڈے پر عملدرآمد شروع کردیا گیا ہے، اسلام آباد میں محمد شہباز شریف سے گورننس کی بہتری کیلئے نئے تعینات شدہ ماہرین نے ملاقات کی۔ملاقات کے دوران گفتگو کرتے ہوئے میاں شہبازشریف کا کہنا تھا کہ گورننس کی بہتری کیلئے ماہرین کی تعیناتی سے فیصلہ سازی کے عمل میں بہتری آئے گی، عوامی مفاد کے اہم فیصلوں کی ماہرین کی رائے اور تنقیدی جائزے کے بعد منظوری سے دور رس مثبت نتائج مرتب ہوں گے۔
انہوں نے کہا کہ میرے لئے یہ انتہائی قابل مسرت امر ہے کہ ہم باصلاحیت اور اپنے شعبوں میں گراں قدر خدمات سر انجام دینے والے لوگوں کی خدمات سے مستفید ہوں گے، آپ سب پر ملکی امور کی فیصلہ سازی میں ماہرانہ رائے اور تعمیری سوچ شامل کرنے کی اہم ذمہ داری ہے۔وزیرِ اعظم کا کہنا تھا کہ پر امید ہوں کہ آپ اپنی ذمہ داریاں انتہائی احسن طریقے سے سر انجام دیں گے، حکومت ملک کے ہر شعبے میں بہتری کیلئے اصلاحات کا ایجنڈا نافذ کر رہی ہے، ڈیجیٹائزیشن، خودکار نظام اور فیصلہ سازی میں بہتری ہی جدید دور میں ترقی و خوشحالی کے ضامن ہیں۔
دوسری جانب دوران بریفنگ حکام نے وزیراعظم کو بتایا کہ یہ ماہرین اپنے شعبہ جات میں حکومت کو ماہرانہ اور تنقیدی رائے اور جائزہ دیں گے، جس سے مختلف سیکٹرز میں بہتر فیصلے کرنے میں مدد ملے گی۔
ملاقات میں وفاقی وزیرِ اقتصادی امور احد خان چیمہ، رانا احسان افضل اور متعلقہ اعلیٰ حکام نے شرکت کی، اجلاس میں نئے تعینات شدہ افسران کے تعارف کے ساتھ ان کی ذمہ داریوں سے بھی آگاہ کیا گیا۔