اسٹیٹ بینک نے عیدالفطر 2025 پر نئے کرنسی نوٹوں کی ایس ایم ایس سروس بحال نہیں کی

کراچی (قدرت روزنامہ) — اسٹیٹ بینک آف پاکستان نے رواں سال عیدالفطر 2025 کے موقع پر بھی ماضی کی طرح ایس ایم ایس سروس کے ذریعے نئے کرنسی نوٹوں کے اجرا سے گریز کیا ہے۔ رمضان المبارک کے آخری عشرے میں جہاں عید کی تیاریاں عروج پر ہیں، وہیں شہریوں کو ایک بار پھر نئے نوٹوں کی عدم دستیابی کا سامنا کرنا پڑے گا۔

یاد رہے کہ کورونا وبا کے بعد اسٹیٹ بینک نے ایس ایم ایس کے ذریعے نئے نوٹوں کی فراہمی کا سلسلہ معطل کر دیا تھا، اور 2020 کے بعد سے یہ سہولت دوبارہ بحال نہیں کی گئی۔

ذرائع کے مطابق اس سال بھی اسٹیٹ بینک نے عوام کے لیے کوئی باضابطہ نوٹوں کی فراہمی کا شیڈول یا سسٹم متعارف نہیں کرایا۔ البتہ روایتی طور پر کرنسی ڈیلرز اور بلیک مارکیٹ میں نئے نوٹ زائد قیمت پر فروخت کیے جا رہے ہیں، جہاں شہری اپنی ضرورت کے تحت خریداری کر رہے ہیں۔

عوامی حلقوں کا کہنا ہے کہ اسٹیٹ بینک کو ایس ایم ایس سروس یا متبادل طریقہ کار کے تحت شہریوں کو باقاعدہ، محفوظ اور آسان رسائی فراہم کرنی چاہیے تاکہ ہر سال کی طرح اس سال بھی بچے اور بڑے عید کی عیدی نئے کرنسی نوٹوں کی صورت میں وصول کر سکیں۔

واضح رہے کہ عیدالفطر 2025 کی ممکنہ تاریخ 31 مارچ ہے، تاہم چاند کی حتمی رویت کا اعلان مرکزی رویت ہلال کمیٹی کی جانب سے کیا جائے گا، جس کے بعد عید کی تعطیلات کا آغاز ہوگا۔