شاہد آفریدی کا کرس گیل کو خراج تحسین

(قدرت روزنامہ)پاکستان کرکٹ ٹیم کے سابق کپتان شاہد آفریدی نے ویسٹ انڈیز کے جارح مزاج بیٹسمین کرس گیل کو خراج تحسین پیش کیا ہے۔

شاہد آفریدی کا کہنا ہے کہ کرس گیل ٹی ٹوئنٹی کرکٹ کے عظیم کھلاڑیوں میں سےایک ہیں، شاندار کیریئر پر کرس گیل کو مبارک باد پیش کرتا ہوں۔

سابق کپتان پاکستان کرکٹ ٹیم نے کہا کہ نئی جنریشن کے پوری دنیا کے کھلاڑیوں کو کرس گیل نے بہت متاثر کیا۔

واضح رہے کہ آسٹریلیا کے خلاف ٹی ٹوئنٹی ورلڈکپ 2021 میں اپنی اننگز کے اختتام پر کرسٹوفر ہینری گیل المعروف کرس گیل کو ساتھی کھلاڑیوں نے کھڑے ہوکر ڈگ آؤٹ میں خوش آمدید کہا۔

ان سے متعلق سوشل میڈیا پر یہ چہ مگوئیاں جاری ہیں کہ وہ اب ویسٹ انڈیز کے لیے دوبارہ کھیلتے ہوئے نظر نہیں آئیں گے۔

شاہد آفریدی کا کرس گیل کو خراج تحسین
کرکٹ ویسٹ انڈیز نے کرس گیل اور ڈیوین براوو کی تصاویر شیئر کرتے ہوئے لکھا کہ تھا کہ دونوں کرکٹ کے عظیم کھلاڑیوں میں سے ایک ہیں۔

واضح رہے کہ ڈیوین براوو نے دو روز قبل سری لنکا کے خلاف میچ کے بعد بین الاقوامی ٹی ٹوئنٹی کرکٹ سے ریٹائرمنٹ کا باضابطہ اعلان کردیا تھا۔

اسی کو دیکھتے ہوئے جب ڈیوین براوو آؤٹ ہوکر پویلین لوٹے تو تمام کھلاڑیوں نے ان کا کھڑے ہوکر استقبال کیا تھا۔

کیا کرس گیل نے بھی بین الاقوامی کرکٹ کو خیرباد کہہ دیا؟

قبل ازیں جب صرف 15 رنز کی اننگز کھیل کر آؤٹ ہونے والے کرس گیل ڈگ آؤٹ پہنچے تو انہوں نے ایک ہاتھ میں اپنا بلا اور ایک ہاتھ میں اپنا ہیلمنٹ اس طرح بلند کیا جیسے کہ انہوں نے بہت کچھ حاصل کرلیا تھا۔

تمام کھلاڑیوں نے بھی ان کا استقبال کیا جبکہ ریٹائرمنٹ کا باضابطہ اعلان کرنے والے ڈیوین براوو نے کرس گیل کو گلے سے لگایا۔

خودساختہ یونیورس باس نے 79 میچز میں ویسٹ انڈیز کی نمائندگی کی جس میں انہوں نے 75 اننگز میں 27.92 کی اوسط سے 1899 رنز بنائے جس میں 2 سنچریاں اور 14 نصف سنچریاں بھی شامل ہیں۔

بولنگ کے شعبے کی بات کی جائے تو کرس گیل نے ویسٹ انڈیز کے لیے 29 اننگز میں مجموعی طور پر 19 وکٹیں لیں۔