لیگی رہنما ثانیہ عاشق کو میسجز پر تنگ کرنے والے نوجوان کا موقف سامنے آ گیا

لاہور(قدرت روزنامہ) مسلم لیگ (ن) کی رکن پنجاب اسمبلی ثانیہ عاشق سے منسوب جھوٹی ویڈیو وائرل کرنے کے معاملے میں گذشتہ روز گرفتاری ہوئی تھی۔ وفاقی تحقیقاتی ایجنسی (ایف آئی ای) کے مطابق سائبرکرائم ونگ نے ملزم کو ٹیکسلا سے گرفتارکیا۔ایم پی اے ثانیہ عاشق نے ایف آئی اے سائبرکرائم ونگ لاہور کو تحریری شکایت کی تھی۔
ایف آئی اے کے مطابق شکایت میں بتایا گیا تھا کہ ملزم نے نازیبا ویڈیو کوثانیہ عاشق سے منسوب کیا تھا۔ایف آئی اے زرائع کا کہنا ہے کہ ملزم عمران خان مبینہ طور پر خاتون ایم پی اے کو موبائل میسجز کے ذریعے تنگ کرتا تھا جوا راولپنڈی کا رہائشی ہے۔گرفتار ملزم کا کہنا تھا کہ اس نے سوشل میڈیا پر ایک ویڈیو دیکھ کر انہیں میسجز کیے تھے جس کا کوئی غلط مقصد نہیں تھا۔

ایف آئی اے لاہور سائبر کرائم ونگ نے ملزم عمران خان کا موبائل قبضے میں لے کر مقدمہ درج کر کے تفتیش شروع کر دی ہے۔واضح رہے کہ مسلم لیگ ن کی ایم پی اے ثانیہ عاشق نے ایف آئی اے سائبر کرائم ونگ کو درخواست دی تھی کہ انہیں سوشل میڈیا پر ہراساں کیا جارہا ہے اور دھمکیاں بھی دی جارہی ہیں۔ درخواست کے متن میں مزید کہا گیا کہ ان کیخلاف سوشل میڈیا پر نامعلوم افراد نے مہم چلا رکھی ہے۔
رکن پنجاب اسمبلی ثانیہ عاشق نے درخواست میں مزید بتایا کہ میرے نام سے منسوب جعلی ٹک ٹاک اور سوشل میڈیا اکاؤنٹس پر میری ویڈیوز وائرل اور تصاویر استعمال کی گئی ہیں۔ ثانیہ عاشق نے مختلف نمبرز سے متعدد کالز اور میسیجز کا ریکارڈ سمیت سوشل میڈیا اکاؤنٹس کے اسکرین شاٹس بھی ایف آئی اے کو فراہم کیے ہیں۔
ن لیگ کی رکن پنجاب اسمبلی ثانیہ عاشق کی جانب سے درخواست ملنے کے بعد فیڈرل انویسٹی گیشن ایجنسی نے کارروائی شروع کردی گئی تھی۔
ایف آئی اے سائبر کرائم ونگ میں درخواست جمع کروانے کے موقع پر ن لیگی رہنماء عطاءاللہ تارڑ بھی ان کے ہمراہ تھے۔ ن لیگی رہنماء عطاءاللہ تارڑ نے کہا کہ سائبر کرائم ایکٹ کے تحت ایف آئی اے میں درخواست جمع کروائی اور امید کرتے ہیں کہ ذمہ داران کے خلاف کارروائی عمل میں لائی جائے گی۔ ثانیہ عاشق کے خلاف جھوٹی نازیبا وڈیوز اور تصاویر پھیلانے والوں کو شرم آنی چاہیے۔ مرحوم والد کی بستر مرگ پر تصاویر تک کو غلط رخ دیا گیا۔