احمد آباد میں تباہ ہونے والے بھارتی طیارے کا بچ جانے والا واحد مسافر کون ہے؟
ممبئی(قدرت روزنامہ) بھارتی مسافر طیارے کے حادثے میں ایک 40 سالہ مسافر کی زندگی بچ گئی محفوظ رہا جس کی شناخت وشواش کمار رمیش کے نام سے ہوئی۔رمیش بھارتی نژاد برطانوی شہری ہے جو اپنے اہل خانہ سے ملنے بھارت آیا تھا اور واپس برطانیہ جا رہا تھا۔ رمیش نے ہندوستان ٹائمز سے گفتگو کرتے ہوئے بتایا کہ وہ گزشتہ 20 برسوں سے لندن میں مقیم ہیں اور اپنے بھائی کے ساتھ بھارت آئے تھے جو اسی طیارے میں سوار تھے۔رمیش نے بتایا کہ ٹیک آف کے تیس سیکنڈ بعد ایک زور دار دھماکا ہوا اور پھر طیارہ گر کر تباہ ہو گیا۔ یہ سب کچھ بہت تیزی سے ہوا۔
انہوں نے مزید بتایا کہ مجھے سینے، آنکھوں اور پیروں پر چوٹیں آئیں لیکن میں مکمل ہوش میں اور بات چیت کے قابل تھا۔زندہ بچ جانے والے واحد مسافر نے مزید کہا کہ جب میں اٹھا تو میرے ارد گرد لاشیں پڑی تھیں۔ میں بہت ڈر گیا تھا۔انہوں نے مزید بتایا کہ میں فوراً اٹھا اور بھاگا۔ طیارے کے پرخچے ہر طرف بکھرے ہوئے تھے۔ کسی نے مجھے پکڑا، ایمبولینس میں ڈالا اور ہسپتال پہنچایا۔
دوسری جانب اس حادثے کے بعد احمد آباد پولیس کمشنر گیانندرا سنگھ ملک نے ایسوسی ایٹڈ پریس (AP) کو بتایا تھا کہ بظاہر حادثے میں کوئی زندہ نہیں بچا۔ تاہم وشواش کمار کے زندہ بچنے کی خبر سامنے آنے کے بعد صورتحال میں نیا موڑ آ گیا ہے۔رمیش کو زخمی حالت میں ہسپتال منتقل کیا گیا ہے جہاں اسے کچھ دیر کے لیے انتہائی نگہداشت کے وارڈ میں بھی رکھا گیا۔ مسافر کا زندہ بچ جانا کسی معجزے سے کم نہیں۔زندہ بچ جانے والے واحد مسافر رمیش کے اہل خانہ کو خبر ملی تو وہ فرط جذبات پر قابو نہ رکھ سکے۔ ہسپتال میں جذباتی مناظر دیکھنے کو ملے۔خیال ظہار کیا جا رہا ہے کہ زندہ بچ جانے والا مسافر پچھلی سیٹوں پر بیٹھا تھا اور جب طیارہ ہاسٹل کی چھت پر گرا تو جہاں مسافر بیٹھا وہ حصہ جلنے سے رہ گیا۔
