کرکٹ گراؤنڈ دیکھنے گیا تو گراؤنڈ مین نے تھپڑ مار کر باہر نکال دیا: محمد رضوان

لاہور(قدرت روزنامہ)ٹی ٹونٹی ورلڈکپ میں شاندار کارکردگی دکھانے والے وکٹ کیپر بیٹسمین محمد رضوان کا ایک انٹرویو سوشل میڈیا پر وائرل ہے جس میں انہوں نے کچھ دلچسپ باتیں کیں۔ محمد رضوان نے اس انٹرویو میں اپنے بیک گراؤنڈ سمیت بہت سی چیزوں پر بات کی۔ رضوان کا کہنا تھا کہ یہ بات سب کو پتا ہے کہ ان کا تعلق کسی بڑے گھرانے سے نہیں اور نہ ہی وہ کسی بہت غریب فیملی سے تعلق رکھتے ہیں اس کے برعکس ان کا تعلق ایک متوسط طبقے سے ہے اور اسی وجہ سے ان کے پاس کرکٹ کھیلنے کے لیے سامان بھی نہیں ہوتا تھا ۔
قومی ٹیم کے وکٹ کیپر بلے باز نے کہا کہ جب میں کرکٹ گراؤنڈ دیکھنے کی خواہش میں گراؤنڈ گیا تو مجھ سے گراؤنڈ مین نے پوچھا یہاں کیا کررہے ہو ؟، اس پر میں نے فوراً جواب دیا گراؤنڈ دیکھنے آیا ہوں تو اس نے پیچھے سے تھپڑ مار کر باہر نکلنے کا کہا۔

سوشل میڈیا اکاؤنٹس کے حوالے سے رضوان نے بتایا کہ ان کے پاس سوائے ٹوئٹر کے تصدیق شدہ اکاؤنٹ کے اور کوئی اکاؤنٹ نہیں ہے، ایک واٹس ایپ اکاؤنٹ ہے جو کہ صرف فیملی کے لیے رکھا ہوا ہے ،اس کے علاوہ انہیں سوشل میڈیا کے حوالے سے کچھ نہیں پتا اور یہی وجہ تھی کہ جب انہیں وزڈن کرکٹر کا ایوارڈ دیا گیا تو انہیں کسی اور کھلاڑی نے اس حوالے سے آگاہ کیا۔

رضوان نے مزید بتایا کہ کرکٹ ٹیم کے حوالےسے کوئی بات ہو تو ہمارے میڈیا مینیجر ابراہیم بدیس مجھ تک پہنچاتے ہیں ۔