وزیراعظم عمران خان کا ملک میں ہر 5سال بعد مردم شماری کرانے کا فیصلہ

اسلام آباد (قدرت روزنامہ) دسمبر 2022 میں مردم شماری مکمل کرلی جائے گی، وزیراعظم عمران خان کا ملک میں ہر 5سال بعد مردم شماری کرانے کا فیصلہ۔ تفصیلات کے مطابق ملک میں ہر پانچ سال بعد مردم شماری کرانے کا فیصلہ کیا گیا ہے۔ یہ فیصلہ وزیراعظم عمران خان نے کیا ہے۔نجی ٹی وی کے مطابق وفاقی وزیر منصوبہ بندی اسد عمر نے ورکرز کنونشن سے خطاب کرتے ہوئے انکشاف کیا کہ وزیراعظم عمران خان نے فیصلہ کیا ہے کہ ملک میں ہر پانچ سال کے بعد مردم شماری کرائی جائے گی۔
پاکستان تحریک انصاف سے تعلق رکھنے والے وفاقی وزیر اسد عمر نے کہا کہ وزیراعظم عمران خان نے کراچی کو صدر پاکستان اورگورنرسندھ دیے ہیں۔وفاقی وزیر اسد عمر نے کہا کہ عمران خان کی جدوجہد میرٹ اورانصاف کے لیے ہے۔

ان کا کہنا تھا کہ وفاق کی معاونت سے کراچی کی ترقی کا سفر شروع ہوا ہے۔انہوں نے کہا کہ دسمبر 2022 میں مردم شماری مکمل کرلی جائے گی۔

ان کا کہنا تھا کہ کراچی کا دیرینہ مطالبہ مردم شماری رہا ہے۔انہوں نے زور دے کر کہا کہ کراچی کی نوکریاں کراچی والوں کو ملنی چاہئیں۔ ان کا کہنا تھا کہ آئندہ دو ہفتے میں وزیراعظم عمران خان کراچی کا دورہ کریں گے۔ وہ کراچی میں گرین لائن کا افتتاح کریں گے۔پی ٹی آئی سے تعلق رکھنے والے وفاقی وزیر اسدعمر نے الزام عائد کیا کہ سندھ حکومت نے مقامی حکومتوں سے اختیارات چھین لیے ہیں۔ ان کا کہنا تھا کہ حکومت سندھ کے نئے نظام کو یکسر مسترد کرتے ہیں۔