نور مقدم قتل کیس، ظاہر جعفر کے ذہنی مریض ہونے کی درخواست دائر کر دی گئی

اسلام آباد(قدرت روزنامہ) نور مقدم قتل کیس میں ملزم ظاہر جعفر کے ذہنی مریض ہونے کی درخواست دائر کی گئی ہے۔تفصیلات کے مطابق اسلام آباد کی ڈسٹرکٹ سیشن کورٹ میں نور مقدم قتل کیس کی سماعت ہوئی۔ایڈیشنل سیشن جج عطا ربانی نے کیس کی سماعت کی۔کیس کے مرکزی ملزم ظاہر جعفر کے وکیل نے ملزم کے ذہنی مریض ہونے کی درخواست دائر کی۔
ظاہر جعفر کے وکیل نے عدالت سے میڈیکل بورڈ تشکیل دے کر چیک اپ کرنے کی بھی استدعا کی۔یہاں واضح رہے کہ نور مقدم قتل کیس کی 24 نومبر کو ہونے والی سماعت میں مرکزی ملزم ظاہر جعفر نے کمرہ عدالت میں وکالت نامے پر دستخط کرنے سے انکار کرتے ہوئے اپنی ڈرامے بازی جاری رکھی۔ عدالت میں ظاہر جعفر سمیت دیگر تمام ملزمان کو لایا گیا اور ملزمان کے وکلا اسد جمال، اکرم قریشی، شہزاد قریشی، سجاد بھٹی، ملک شہباز رشید، میاں سیف اللہ اور بشارت اللہ عدالت میں پیش ہوئے۔

ملزم کی والدہ عصمت آدم جی کے وکیل اسد جمال نے عدالت سے مکمل سی سی ٹی وی فوٹیج فراہم کرنے کا حکم دینے کی درخواست کی۔ مرکزی ملزم ظاہر جعفر سمیت دیگر تمام ملزمان کو عدالت میں پیش کیا گیا۔ عدالت نے مدعی کے وکیل سے متعلق استفسار کیا ۔ عدالت نے استفسار کیا کہ مدعی کے وکیل کدھر ہیں تو وکیل بابر حیات نے بتایا کہ وہ سپریم کورٹ میں مصروف ہیں۔
مرکزی ملزم ظاہر جعفر سے وکیل نے وکالت نامے پر دستخط کروانے کی کوشش کی تو ملزم ظاہر جعفر نے کہا کہ وکالت نامہ پر دستخط نہیں کروں گا پہلے وکیل سے الگ ملاقات کرنا چاہتا ہوں۔ وکلا نے استغاثہ کے گواہ محمد جابر کمپیوٹر آپریٹر کے بیان پر جرح مکمل کی، اس دوران مرکزی ملزم بار بار بولنے کی کوشش کرتا رہا۔ عدالت میں سماعت کے دوران مرکزی ملزم نے مالی کے بھائی حسین کے ساتھ مکالمہ کیا اور پوچھا کہ آج آپ پانی کیوں نہیں لے کر آئے۔ عدالت نے مرکزی ملزم ظاہر جعفر کو واپس لے جانے کا حکم دے دیا۔ عدالت نے سی سی ٹی وی ویڈیو فراہم کرنے کی درخواست پر فیصلہ محفوظ کر لیا۔ جس کے بعد کیس کی مزید سماعت یکم دسمبر تک ملتوی کر دی گئی تھی۔