پاکستان کی 74 سالہ تاریخ میں اس وقت سب سے زیادہ مہنگائی ہے ،ترجمان مسلم لیگ ن عظمی بخاری

لاہور(قدرت روزنامہ) مسلم لیگ ن پنجاب کی ترجمان عظمیٰ بخاری نے کہا ہے کہ پنجاب کے عوام سب سے زیادہ تبدیلی سرکار کو بھگت رہے ہیں ۔انہوں نے کہا کہ ملک کا سب سے بڑا صوبہ وزیر خوراک سے محروم اور مہنگائی آسمان کو چھو رہی ہے ۔تفصیلات کے مطابق مسلم لیگ ن پنجاب کی ترجمان عظمیٰ بخاری نے حکومت کی پالیسیوں ٰپر سخت تنقید کی اور کہا کہ پاکستان میں مہنگائی 74سال کی بلند ترین سطح پر پہنچ گئی ہے۔
عظمیٰ بخاری نے کہا کہ مہنگائی آسمان کو چھو رہی ہے اور پنجاب کا وزیر صنعت، وزیر خزانہ اور وزیر خوراک لاپتہ ہیں، عثمان بزدار اکیلے اپنے فرنٹ مین سنبھالیں یا لاپتہ وزراء کی وزارتیں؟اُن کا کہنا تھا کہ حکومت کی غلط معاشی پالیسیوں کی بدولت مہنگائی 14فیصد شرح تک پہنچی ہے، 15ہزار ماہانہ تنخواہ لینے والا مزدور 14فیصد مہنگائی میں اضافے کو کیسے برداشت کرسکتا ہے؟ گھی، چینی، آٹا، دالیں، سبزیاں، پھل سمیت تمام خوردنی اشیاء غریب کی پہنچ سے دور ہو چکی ہیں۔
عظمیٰ بخاری نے مزید کہا کہ قوم کے اربوں روپے عمران نیازی کے دوستوں کے قریب تر ہوچکے ہیں، نئے پاکستان میں غریب کنگال اور عمران نیازی کے دوست خوشحال ہو رہے ہیں، عمران خان چار بار اپنی مہنگائی ٹیم اورچار وزیر خزانہ تبدیل کرچکے ہیں ۔