کتابوں سے آگے سیکھنے کا سفر،پشین کے طلبہ اب عملی مہارتوں سے آراستہ

کوئٹہ (قدرت روزنامہ)بلوچستان میں تعلیم کے شعبے میں ایک اہم قدم اٹھاتے ہوئے سیکرٹری تعلیم اسفندیار خان نے گورنمنٹ گرلز ہائی اسکول خنوزئی، پشین میں ہیلتھ کیئر اسکلز سینٹر کا افتتاح کیا۔ یہ منصوبہ یورپی یونین کے تعاون سے قائم کیا گیا ہے تاکہ طلبہ کو جدید عملی تربیت فراہم کی جا سکے۔

افتتاحی تقریب میں خطاب کرتے ہوئے سیکرٹری تعلیم نے کہا کہ صوبے میں تعلیمی اصلاحات کا مقصد محض نصابی تعلیم تک محدود نہیں بلکہ طلبہ کو عملی زندگی میں کام آنے والی مہارتوں سے بھی آراستہ کرنا ہے۔ انہوں نے مزید کہا کہ یہ اسکلز سینٹرز نہ صرف طلبہ کو صحت، آئی ٹی اور دیگر فنی شعبوں میں ہنر سکھائیں گے بلکہ انہیں مستقبل میں روزگار کے بہتر مواقع بھی فراہم کریں گے۔

اس موقع پر سیکرٹری تعلیم نے آئی ٹی اسکلز سینٹر کا بھی معائنہ کیا اور وہاں زیر تربیت طلبہ سے گفتگو کی۔ انہوں نے طلبہ سے ان کی سیکھنے کے عمل کے بارے میں سوالات کیے اور انہیں نصیحت کی کہ وہ تعلیم کے ساتھ ساتھ عملی مہارتوں کو بھی بھرپور توجہ سے حاصل کریں۔

سیکرٹری تعلیم نے بتایا کہ صوبے کے مختلف اضلاع میں بھی ایسے مراکز قائم کیے جا رہے ہیں اور اس مقصد کے لیے ایک خصوصی ٹاسک فورس تشکیل دی گئی ہے جو ان منصوبوں کی نگرانی کرے گی۔ ان کا کہنا تھا کہ یہ ہمارے طلبہ کے لیے کتابی علم سے آگے بڑھنے اور عملی زندگی کے تقاضوں کے مطابق اپنے آپ کو تیار کرنے کا ایک منفرد موقع ہے۔