بھارتی کپتان کی متنازع گفتگو،آئی سی سی نے پی سی بی کی درخواست پر فیصلہ سنا دیا

دبئی (قدرت روزنامہ)آئی سی سی(ICC) نے ایشیا کپ میں پاک بھارت میچ کے بعد پریزنٹیشن میں متنازع اور سیاسی بیان بازی پر بھارتی کپتان سوریا کمار یادیو کی سرزنش کی ہے۔

ذرائع کے مطابق معاملے پر سوریا کمار یادیو کی آئی سی سی حکام کے سامنے سماعت ہوئی ہے۔آئی سی سی نے بھارتی کپتان سوریا کمار یادیو کو مستقبل میں سیاسی بیان نہ دینے کی ہدایت کی ہے۔ذرائع کے مطابق بھارتی کپتان کو مستقبل میں محتاط رہنے کی ہدایت بھی کی گئی۔

یاد رہے 14 ستمبر کو بھارتی کپتان سوریا کمار نے ایشیا کپ کے گروپ اسٹیج میچ میں جیت کے بعد پریزنٹیشن میں گفتگو کرتے ہوئے پہلگام واقعے کا ذکر کرتے ہوئے متنازع بات کی تھی۔

پاکستان کرکٹ بورڈ (PCB)کی جانب سے بھارتی کپتان سوریا کمار یادیو کے خلاف آئی سی سی کو خط لکھا گیا تھا جس میں متنازع اور سیاسی بیان بازی پر بھارتی کپتان کے خلاف کارروائی کا مطالبہ کیا گیا تھا۔