بلوچستان پولیس میں بڑے پیمانے پر اکھاڑ پچھاڑ، ڈی آئی جی کوئٹہ سمیت متعدد اضلاع کے ایس ایس پیز تبدیل

آئی جی پولیس نے 23 سے زائد سینئر افسران کے تبادلوں و تقرریوں کا نوٹیفکیشن جاری کردیا، کئی افسران کو سینٹرل پولیس آفس رپورٹ کرنے کی ہدایت

کوئٹہ ( قدرت نیوز ) بلوچستان پولیس میں ایک بڑے انتظامی ردوبدل کے تحت ڈی آئی جی کوئٹہ سمیت متعدد اضلاع کے سربراہان اور دیگر کلیدی عہدوں پر تعینات سینئر پولیس افسران کے تبادلے و تقرریاں کردی گئی ہیں۔ انسپکٹر جنرل آف پولیس بلوچستان کی جانب سے جاری کردہ نوٹیفکیشن کے مطابق، عمران شوکت کو نیا ڈپٹی انسپکٹر جنرل (ڈی آئی جی) کوئٹہ تعینات کردیا گیا ہے، جبکہ ڈی آئی جی سی ٹی ڈی اعتزاز گورایہ سے ڈی آئی جی کوئٹہ کا اضافی چارج واپس لے لیا گیا ہے۔

نوٹیفکیشن کے مطابق کوئٹہ میں اہم ترین عہدے پر تبدیلی کرتے ہوئے نجیب اللہ پندرانی کو نیا ایس ایس پی آپریشنز کوئٹہ مقرر کیا گیا ہے۔ اس کے علاوہ صوبے کے دیگر اضلاع میں بھی اہم تبدیلیاں کی گئی ہیں۔

دیگر اضلاع اور عہدوں پر اہم تعیناتیاں:

ملک محمد اصغر کو ایس ایس پی لورالائی تعینات کردیا گیا۔

منظور احمد بلیڈ کو ایس پی خاران مقرر کیا گیا ہے۔

عبد الحمید کو ایس پی صحبت پور تعینات کیا گیا ہے۔

اللہ بخش کو ایس پی مستونگ مقرر کیا گیا ہے۔

ایاز خان کو ایس پی زیارت کی ذمہ داریاں سونپی گئی ہیں۔

عتیق الرحمان کو ایس پی نوشکی تعینات کیا گیا ہے۔

معاذ الرحمان کو ایس پی کچھی مقرر کیا گیا ہے۔

کوئٹہ میں دیگر اہم تقرریاں:

اسامہ امین چیمہ کو ایس ایس پی ہیڈکوارٹر بی سی کوئٹہ تعینات کردیا گیا۔

کیپٹن (ر) نبیل احمد کو ایس پی آپریشنز سریاب ڈویژن کوئٹہ مقرر کیا گیا ہے۔

عمران قریشی کو ایس ایس پی ایس سی آئی ڈبلیو کوئٹہ تعینات کیا گیا ہے۔

شاہ نواز کو بھی ایس ایس پی سی آئی ڈبلیو کوئٹہ مقرر کیا گیا ہے۔

احمد سلطان کو اے آئی جی پی ڈیولپمنٹ سی پی او کوئٹہ تعینات کردیا گیا۔

علیزاز افضل کو ایس پی او آئی جی پی بلوچستان اور علی رضا کو اے آئی جی پی آئی ٹی سی پی او کوئٹہ تعینات کیا گیا ہے۔

سینٹرل پولیس آفس رپورٹ کرنے والے افسران: نوٹیفکیشن کے مطابق متعدد افسران کو ان کے موجودہ عہدوں سے ہٹا کر فوری طور پر سینٹرل پولیس آفس (سی پی او) کوئٹہ رپورٹ کرنے کی ہدایت کی گئی ہے۔ ان میں اختر نواز، لیفٹیننٹ (ر) محمد بلوچ، فلائٹ لیفٹیننٹ (ر) ذیشان علی، اویس علی خان، کیپٹن (ر) سردار شہریار خان، عاطف سلیم اور رانا محمد دلاور شامل ہیں۔

اس بڑے پیمانے پر تبادلوں کو صوبے میں امن و امان کی صورتحال کو بہتر بنانے اور پولیس کی کارکردگی کو مزید فعال کرنے کی ایک اہم کوشش قرار دیا جا رہا ہے۔