بھارتی کرکٹر روی چندرن ایشون نے پسندیدہ پاکستانی کرکٹرز کے نام بتا دیئے

لاہور (قدرت روزنامہ) بھارتی آف سپنر روی چندر ایشون نے پاکستانی کرکٹرز کی کھل کر تعریف کرکے پاکستانیوں کے دل جیت لیے۔ بھارتی ٹیسٹ کرکٹر سے حال ہی میں ایک سوال و جواب کے سیشن میں پاکستانی کرکٹ ٹیم میں پسندیدہ کھلاڑیوں کے حوالے سے پوچھا گیا جس کا تفصیلی جواب دیتے ہوئے انہوں نے پاکستان میں کرکٹ کے بے پناہ ٹیلنٹ کا اعتراف بھی کیا۔
روی چندرن ایشون نے انکشاف کیا کہ میں کافی عرصے سے وکٹ کیپر بیٹر محمد رضوان کو فالو کررہا ہوں اور بلاشبہ وہ ایک شاندار کھلاڑی ہیں اور اپنی ہر نئی اننگ میں بہترین فارم میں ہوتے ہیں۔ بھارتی کرکٹر نے محمد رضوان کی تعریف کے بعد فوری طور پر بابراعظم کا نام لیا اور ان کی بلے بازی کی صلاحیتوں کو سراہتے ہوئے کہا کہ پاکستان کے فیورٹ کھلاڑیوں کی بات ہو اور ورلڈ نمبر ون بلے باز بابراعظم کا تذکرہ نہ ہو ایسا تو ممکن ہی نہیں ۔

بعد ازاں انہوں نے پاکستان میں باصلاحیت نوجوان کرکٹرز کی موجودگی کا اعتراف کرتے ہوئے شاہین شاہ آفریدی کو حقیقی ٹیلنٹ قرار دیا۔ انہوں نے یہ بھی کہا کہ پاکستان کے پاس ہمیشہ باصلاحیت کرکٹرز رہے ہیں اور اب بھی ان کے پاس بے شمار باصلاحیت کرکٹرز موجود ہیں۔