چیف الیکشن کمشنر پر الزامات؛ فواد چوہدری اور اعظم سواتی کی معافی قبول

(قدرت روزنامہ)الیکشن کمیشن نے چیف الیکشن کمشنر پر الزامات کے حوالے سے فواد چوہدری اور اعظم سواتی کی معافی قبول کرلی ہے۔

الیکشن کمیشن کے دو رکنی بینچ نے وزیر ریلوے اعظم خان سواتی کے خلاف الیکشن کمیشن اور چیف الیکشن کمشنر پر الزامات کے معاملے پر سماعت کی۔ اعظم سواتی الیکشن کمیشن کے روبرو ذاتی حیثیت میں پیش ہوئے۔

سندھ سے الیکشن کمیشن کے رکن نثار درانی نے اعظم سواتی کو مخاطب کرتے ہوئے استفسار کیا کہ اعظم سواتی صاحب آپ مصروف آدمی ہیں پیش کیوں نہیں ہوتے، تمام ادارے آپ کے ہیں انہیں برا بھلا کہنا درست نہیں، آپ پر ذمہ داری زیادہ ہے۔

اعظم خان سواتی نے جواب میں کہا کہ میں نے ہمیشہ الیکشن کمیشن کو خودمختار بنانے کے لئے آواز اٹھائی ہے۔

بعد ازاں الیکشن کمیشن نے فواد چوہدری اور اعظم سواتی کی معافی قبول کرتے ہوئے دونوں کو آئندہ کے لیے محتاط رہنے کی ہدایت کردی۔

الیکشن کمیشن کے باہر میڈیا سے بات کرتے ہوئے اعظم خان سواتی نے کہا کہ ان کی معذرت قبول کرنے پر الیکشن کمیشن کا شکریہ ادا کرتا ہوں، الیکشن کمیشن کو ہر لحاظ سے طاقتور کیا جائے گا، حکومت الیکشن کمیشن کو مستحکم کرنے کے لیے ساتھ کھڑی ہوگی، ای وی ایم کے ذریعے ووٹ کے تقدس کی حفاظت کی جائے گی، اس حوالے سے الیکشن کمیشن اچھے فیصلے کرنے والا ہے۔

کیس کا پس منظر

چند ماہ قبل اعظم خان سواتی نے سینیٹ کی قائمہ کمیٹی کے اجلاس کے دوران الیکٹرنک ووٹنگ مشین کے معاملے پر الیکشن کمیشن اور چیف الیکشن کمشنر پر الزام لگائے تھے، انہوں نے کہا تھا کہ الیکشن کمیشن نے پیسے پکڑے ہوئے ہیں۔ یہ ادارہ ہی ملک کی جمہوریت کو تباہ کرنے کا باعث ہے، ایسے اداروں کو آگ لگا دی جائے۔

بعد ازاں اعظم خان سواتی ، فواد چوہدری اور شبلی فراز نے الگ الگ مواقع پر الیکشن کمیشن اور چیف الیکشن کمشنر پر اسی نوعیت کے الزام لگائے تھے۔ فواد چوہدری نے پہلے ہی الیکشن کمیشن سے معافی مانگ لی تھی۔