خشک موسم کے طویل اسپیل کا 6 سالہ ریکارڈ ٹوٹ جانے کے بعد بھی اہلیاں لاہور کیلئے مایوس کن خبر

لاہور(قدرت روزنامہ) لاہور میں خشک موسم کے طویل اسپیل کا 6 سالہ ریکارڈ ٹوٹ جانے کے بعد بھی اہلیاں لاہور کیلئے مایوس کن خبر، شہر میں موسلادھار بارشوں کے امکانات کم ہو گئے، صوبائی دارالحکومت میں اتوار کی سہ پہر سے پیر کی شام تک بارش ہونے کا امکان۔ تفصیلات کے مطابق محکمہ موسمیات نے مغربی ہوائوں کے سلسلہ کا پاکستان میں داخل ہونے کے بعد اتوار سے منگل تک پنجاب، بلوچستان، سندھ میں بادلوں کے برسنے کی پیشگوئی کی ہے۔
تاہم مغربی ہوائوں کے ملک میں داخل ہونے کے باوجود موسم سرما کی پہلی بارش کو ترسنے والے اہلیان لاہور کیلئے مایوس کن خبر سامنے آئی ہے۔ ماہرین موسمیات کے مطابق کچھ روز قبل تک لاہور میں مغربی ہوائوں کے سلسلے باعث اچھی بارشیں ہونے کی توقع تھی، تاہم مغربی ہوائوں کا مرکز وسطی اور جنوبی علاقوں کی بجائے شمالی علاقوں کی جانب تبدیل ہو جانے سے آئندہ چند روز کے دوران لاہور میں زیادہ بارش ہونے کے امکانات کم ہو گئے ہیں۔
بتایا گیا ہے کہ لاہور میں اتوار کی سہ پہر سے پیر کی شام تک بارش ہونے کا امکان موجود ہے۔ یہاں واضح رہے کہ کچھ روز جاری کی گئی رپورٹ میں بتایا گیا تھا کہ لاہور میں شہر لاہور میں خشک موسم کی طوالت کا 6 سالہ ریکارڈ ٹوٹ گیا ہے۔ لاہور میں 24 اکتوبر کے بعد سے بارش نہیں ہوئی، جبکہ شہر میں سردی کی شدت میں بھی اضافہ ہو گیا۔ بارش نہ ہونے کی وجہ سے خشک سردی نے شہریوں کو طرح طرح کی بیماریوں میں مبتلا کر دیا ہے۔
دسمبر کے آغاز میں بھی لاہور میں بارش کا امکان ظاہر کیا گیا تھا، تاہم صوبائی دارالحکوت پہنچنے والے بادل بنا برسے ہی رخصت ہو گئے تھے۔ پھر دسمبر کے آخر میں لاہور میں اچھی بارشوں کی توقع ظاہر کی گئی، تاہم اب رواں ماہ کے باقی ایام میں بھی لاہور میں زیادہ بارش کے امکانات کم ہو چکے۔ ماہرین موسمیات نے لاہور میں جنوری کے پہلے 2 ہفتوں میں بارشوں کا زیادہ امکان ظاہر کیا ہے۔