تحریک انصاف کی صوبائی صدارت سے ہٹائے جانے کے بعد اعجاز چوہدری نے انٹرا پارٹی الیکشن ای وی ایم کے ذریعے کروانے کا مطالبہ کردیا

اسلام آباد (قدرت روزنامہ) وزیراعظم عمران خان نے کچھ روز قبل تحریک انصاف کی تمام تنظیموں کو تحلیل کر دیا تھا جس میں تحریک انصاف پنجاب کے صدر اعجاز چوہدری، سیف اللہ نیازی، عامر کیانی اور دیگر افراد کو عہدوں سے ہٹا دیا گیا تھا، جس کے ردعمل میں اعجاز چوہدری نے اپنے ٹوئٹر پیغام میں کہا کہ پی ٹی آئی تنظیموں کی تحلیل کے بعد! آئین سازی کے لئے وسیع تر مشاورت کی جائے، عبوری عہدیداران کی موجودگی میں انٹرا پارٹی الیکشن ہو، ای وی ایم کو بھی استعمال کیا جانا چاہیے، بانی چیئرمین جناب عمران خان کے

فرمان کے مطابق پی ٹی آئی کو ایک ادارہ بنایا جائے۔ واضح رہے کہ کچھ دن قبل چیئرمین تحریک انصاف اور وزیراعظم عمران خان نے پارٹی تنظیموں کی تحلیل کے بعد پی ٹی آئی کی نئی تنظیم کا اعلان کردیا تھا۔وفاقی وزیر اطلاعات و نشریات فواد چوہدری نے ٹوئٹر پر جاری ایک بیان میں نئی تنظیم کے حوالے سے بتایاکہ عمران خان کی جانب سے تحریک انصاف کی نئی تنظیم کا اعلان کیا گیا ہے۔وفاقی وزیر نے کہا کہ وفاقی وزیر برائے منصوبہ بندی اسد عمر تحریک انصاف کے نئے سیکرٹری جنرل ہوں گے، پرویز خٹک خیبر پختونخواہ، علی زیدی سندھ، قاسم سوری بلوچستان اور شفقت محمود پنجاب کے صدر ہوں گے۔انہوں نے بتایا کہ خسرو بختیار جنوبی پنجاب کے صدر ہوں گے۔فواد چوہدری کے مطابق چیئرمین پی ٹی آئی نے عامر محمود کیانی کو پارٹی کا ایڈیشنل سیکرٹری جنرل نامزد کیا ہے۔خیال رہے کہ وزیراعظم عمران خان نے خیبر پختونخوا میں پہلے مرحلے کے بلدیاتی انتخابات میں پی ٹی آئی کی کارکردگی اور اپنے خاندانوں میں ٹکٹ بانٹنے پر برہمی کا اظہار کرتے ہوئے مرکز سے لیکر تحصیلوں تک تحریک انصاف کی تمام تنظیموں کو تحلیل کر دیا تھا۔