آئندہ ہفتے چین کا دورہ کرنا ہمیشہ کی طرح باعثِ خوشی ہے، عمران خان

اسلام آباد (قدرت روزنامہ) وزیراعظم عمران خان نے کہا ہے کہ آئندہ ہفتے چین کا دورہ کرنا ہمیشہ کی طرح باعثِ خوشی ہے،سی پیک پاکستان اور چین کو قریب لایا،چین نے کورونا سمیت ہرمشکل میں پاکستان کی مدد کی، پاکستان میں غربت کے خاتمے کیلئے چین کے اصولوں پر چلتا ہوں، جب تک دولت نہیں بڑھتی غربت کم نہیں کی جاسکتی . انہوں نے چینی میڈیا کو انٹرویو دیتے ہوئے کہا کہ پاکستان اور چین کے درمیان بہترین تعلقات ہیں،آئندہ ہفتے چین کا دورہ کررہا ہوں، دورہ چین ہمیشہ باعث خوشی رہا ہے، پاکستان اور چین کے درمیان تعلقات وقت کے ساتھ مضبوط ہورہے ہیں .

انہوں نے کہا کہ چین نے کورونا سمیت ہرمشکل میں پاکستان کی مدد کی . وزیراعظم عمران خان نے کہا کہ شاہراہ قرارقرم بنتے وقت دشوارگزار راستوں کے باوجود کام ہوتا رہا .

انہوں نے کہا کہ سی پیک پاکستان اور چین کے درمیان بہترین منصوبہ ہے، سی پیک پاکستان اور چین کو قریب لایا . انہوں نے کہا کہ خواہش ہے چینی کھلاڑیوں کوکرکٹ سکھائیں، کورونا سے کھیل کی سرگرمیاں متاثر ہوئیں، خیبرپختونخوا میں گلگت سمیت دیگرعلاقے کھیل کے لیے بہترین ہیں، خنجراب پاس کے قریب پاکستان اور چین میں کھیلوں کی سرگرمیوں کے خواہاں ہیں، چین کھیلوں میں آگے نہیں تھا مگرآج وہاں کھیلوں کو ترجیح دی جارہی ہے .

وزیراعظم عمران خان نے کہا کہ چین نے 40 سال محنت کی اورقوم کو غربت سے نکالا، پاکستان میں غربت کے خاتمے کے لیے چین اصول سے رہنمائی لیتا ہوں، جب تک دولت نہیں بڑھتی غربت کم نہیں کی جاسکتی . ہم نے معیشت کو بہتر کرنے کے لیے مزیداقدامات کرنے ہوں گے،زراعت اور لائیواسٹاک کے شعبے میں چین سے معاونت کے خواہاں ہیں، پاکستان چاہتا ہے پیداوار بڑھائے اور زراعت کو بہتر کرے، بدقسمتی سے معیشت پر ماضی میں توجہ نہیں دی گئی .
عمران خان نے کہا کہ مقبوضہ کشمیر میں بھارتی فورسز انسانی حقوق کی خلاف ورزیوں میں ملوث ہیں، عالمی برادری مقبوضہ کشمیر میں بھارتی فو رسز کے مظالم پر خاموشی توڑے، افغانستان 40سال مشکل میں رہا اوراسے میدان جنگ بنایا گیا، مغربی افواج کے انخلا کے بعد وہاں انسانی بحران کا خدشہ پیدا ہوا، عالمی برادری افغانستان کی مدد کرے اور انسانی بحران سے بچانے میں تعاون کرے .