اسلام آباد ؛ موٹرسائیکل سوار ڈاکوؤں کی چیکنگ پر مامور پولیس پر فائرنگ

اسلام آباد (قدرت روزنامہ) وفاقی دارالحکومت اسلام آباد میں موٹرسائیکل سوار ڈاکوؤں نے چیکنگ پر مامور پولیس اہلکاروں پر فائرنگ کردی ۔ تفصیلات کے مطابق اسلام آباد میں فائرنگ کا یہ واقعہ تھانہ کورال کے علاقہ بکھرال چوک میں پیش آیا جہاں چیکنگ کے دوران پولیس نے 2 بلا نمبر مشکوک موٹرسائیکلوں کو رکنے کا اشارہ کیا ، جس پر موٹرسائیکل سوار ملزمان نے اچانک پولیس پر فائرنگ شروع کر دی اور فائرنگ کے تبادلے کے دوران پولیس نے ایک ڈاکو زخمی حالت میں گرفتار کرلیا لیکن 3 فرار ہونے میں کامیاب ہوگئے ، واقعے کی اطلاع ملتے ہی پولیس کی بھاری نفری واقعہ کی جگہ پر پہنچ گئی اور فرار ہونے والے ڈاکوؤوں کی گرفتاری کے لیے سرچ آپریشن شروع کردیا گیا۔
ادھر صوبہ پنجاب کے دارالحکومت لاہور میں 55 سے زائد وارداتوں میں ریکارڈ یافتہ بچھو گینگ کا سرغنہ اپنے ہی ساتھیوں کی فائرنگ میں مارا گیا ، ایس پی کینٹ عیسیٰ سکھیرا نے بتایا کہ 2 موٹر سائیکلوں پر سوار 4 ڈاکوؤں نے برکی کے علاقے میں واردات کی ، ان ڈاکوؤں کی گرفتاری کے لیے کینٹ ڈویژن میں ناکہ بندی کی گئی اور پیٹرولنگ کو الرٹ کیا گیا ، ڈیفنس سی کے علاقے میں پہنچنے پر پولیس کو دیکھتے ہی ڈاکوؤں نے پولیس کی گاڑی پر فائرنگ کر دی ۔

انہوں نے بتایا کہ ڈاکوؤں کی اندھا دھند فائرنگ سے ان کا اپنا ہی ایک ساتھی ہلاک ہو گیا ، ہلاک ڈاکو راہ زنی اور ڈکیتی کی درجنوں وارداتوں میں ریکارڈ یافتہ تھا ، جس نے 2017ء میں نشتر کے علاقے میں دوران مزاحمت پر کانسٹیبل محمد اعظم کو بھی شہید کیا ، پولیس نے فرانزک ٹیموں نے شواہد اکٹھے کرکے بچھو گینگ کے سرغنہ کی لاش تحویل میں لے لی ، جب کہ فرار ڈاکوؤں کی گرفتاری کے لیے چھاپہ مار کارروائی شروع کردی۔