مری اور دیگر علاقوں میں برفباری کا امکان، محکمہ موسمیات نے الرٹ جاری کر دیا

اسلام آباد (قدرت روزنامہ)محکمہ موسمیات نے مری، گلیات اور دیگر بالائی علاقوں میں شدید اور درمیانی درجے کی برفباری کا امکان ظاہر کرتے ہوئے الرٹ جاری کردیا۔نجی ٹی وی کے مطابق محکمہ موسمیات نے کہا ہے کہ منگل سے جمعرات کے دوران مری، گلیات، نتھیاگلی اوردیگرعلاقوں میں درمیانی سے شدید برفباری کاامکان ہے جس کے باعث رابطہ سڑکیں بند ہونے کا خدشہ ہے لہٰذا متعلقہ ادارے الرٹ رہیں۔دوسری جانب محکمہ موسمیات خیبر پختونخوا نے صوبے کے بیشتر علاقوں میں پیر کی رات سے بارشوں اور پہاڑوں پر برفباری کی پیشنگوئی کی ہے۔ اس ضمن میں پی ڈی ایم

اے خیبر پختونخوا نے ضلعی انتظامیہ اورمتعلقہ اداروں کو مراسلہ ارسال کر دیا۔ محکمہ موسمیات کے مطابق ضلع چترال، اپردیر، سوات، مالاکنڈ، کوہستان، شانگلہ، بونیر،مانسہرہ، ایبٹ آباد، ہری پور، صوابی، مردان، نوشہرہ، پشاور، چارسدہ، کوہاٹ، باجوڑ اور کرم میں وقفے وقفے سے بارش اور ژالہ باری کاامکان ہے، جبکہ گلیات، ناران، کاغان چترال، دیر، سوات اور کرم کے پہاڑوں پر برفباری کی توقع ہے۔ ڈی جی، پی ڈی ایم اے شریف حسین کے مطابق بارشوں وبرفباری کے پیش نظر تمام ضلعی انتظامیہ اور متعلقہ اداروں کو پیشگی اقدامات اٹھانے کی ہدایات جاری کر دی ہے۔بارشوں اور برفباری کا یہ سلسلہ جمعہ تک وقفے وقفے سے جاری رہنے کا امکان ہے۔محکمہ موسمیات نے بالائی علاقوں میں لینڈسلائیڈنگ کے خدشہ کے پیش نظر متعلقہ اداروں کو ضروری اقدامات کی ہدایت کی گئی ہے۔انہوں نے کہا کہ پی ڈی ایم اے کا ایمر جنسی آپریشن سنٹر مکمل فعال ہے۔ کسی بھی نا خوشگوار واقعے کی اطلاع پی ڈی ایم اے کی ہیلپ لائن 1700 پر دی جا سکتی ہے۔