ملک بھر کی لوکل ٹرانسپورٹ اور اندرون ملک پروازوں میں کھانا پیش کرنے کی اجازت دے دی گئی

اسلام آباد (قدرت روزنامہ)ملک بھر کی لوکل ٹرانسپورٹ اور اندرون ملک پروازوں میں کھانا پیش کرنے کی اجازت دے دی گئی، نیشنل کمانڈ اینڈ آپریشن سینٹر نے متعلقہ اداروں کو احکامات جاری کردیے .

نیشنل کمانڈ اینڈ آپریشن سینٹر نے سول ایوی ایشن اتھارٹی، وزارت داخلہ اور صوبائی حکومتوں کو مراسلہ ارسال کردیا ہے جس میں دوران سفر کھانا پیش کرنے پر عائد پابندی اٹھانے کے فیصلے سے متعلق آگاہ کیا گیا ہے .

ذرائع کے مطابق مراسلے میں کہا گیا کہ اندرون ملک پروازوں میں کھانا پیش کرنے کی اجازت ہوگی، ملک بھر کی لوکل ٹرانسپورٹ میں بھی کھانا پیش کرنے کی اجازت دے دی گئی ہے . ذرائع کے مطابق یکم مارچ سے دوران سفر کھانا پیش کرنے کی اجازت ہوگی، متعلقہ ادارے دوران سفر کھانا پیش کرنے کی پابندی اٹھانے کے اقدامات کریں .