کتاب میں الزامات، مراد سعید نے ریحام خان کو قانونی نوٹس بھیج دیا

اسلام آباد(قدرت روزنامہ)آپ کے شائع کردہ مسودے کا حوالہ دے کر تہمت لگائی گئی ، وفاقی وزیر برائے مواصلات مراد سعید کی کارکردگی کو متنازع بنایاگیا، مراد سعید نے اپنے متعلق کتاب میں الزامات پر ریحام خان کو قانونی نوٹس بھیج دیا۔ تفصیلات کے مطابق وفاقی وزیر برائے مواصلات مراد سعید نے وزیراعظم عمران خان کی سابقہ اہلیہ ریحام خان کو قانونی نوٹس بھیج دیا۔

قانونی نوٹس ریحام خان کی کتاب میں مرادسعید سے متعلق الزامات پردیاگیا جس میں کہا گیا ہے کہ آپ کے شائع کردہ مسودے کا حوالہ دے کر تہمت لگائی گئی ہے، مسودے کا حوالہ دےکر وزارت مواصلات کی کارکردگی کو متنازع بنایاگیا۔نوٹس کے ساتھ مختلف ٹی وی پروگراموں کی ویڈیوز اور سوشل میڈیا پوسٹس بھی منسلک کی گئی ہیں اور کہا گیا ہے کہ ان تمام بہتانوں میں آپ کی تحریرکاحوالہ ہے، آپ اسے ری ٹوئٹ بھی کرتی رہی ہیں۔

نوٹس کے مطابق 14 دن میں اپنی تحریرکی وضاحت کرکے معافی مانگیں بصورت دیگر قانونی کارروائی کیلئے تیار ہوجائیں، وضاحت اور معافی نہ مانگنے پر عدالت سے سخت سزااور ایک ارب ہرجانے کی استدعا کی جائے گی۔نوٹس میں کہا گیا ہے کہ مسودے سے مراد سعید کی ہتک اور وزارت سے منسلک اہلکاروں کی حوصلہ شکنی ہوئی، آپ کی تحریر کے ذریعے بہتان تراشی اور غلیظ پروپیگنڈا کیا جاتا ہے، آپ کےنام سے پہلےایک مسودہ لیک ہوا جس کی آج تک آپ نے تردید نہیں کی۔