دوسروں کو نہ گھبرانے کا مشورہ دینے والے خود گھبرا گئے،شاہد خاقان عباسی

اسلام آباد(قدرت روزنامہ) پاکستان مسلم لیگ ن کے مرکزی نائب صدر سابق وزیر اعظم شاہد خاقان عباسی نے کہا ہے کہ دوسروں کو نہ گھبرانے کا مشورہ دینے والے خود گھبرا گئے، بتایا جائے پٹرول کی قیمت میں کمی کو کہاں سے پورا کیا جائےگا، مہنگائی کم ہونے کے بجائے مزید بڑھے گی، اگلی حکومت کیلئے مشکلات ہوں گی، نئے انتخابات کی فوری ضرورت ہے۔

انہوں نے میڈیا سے گفتگو کرتے ہوئے کہا کہ دوسروں کو نہ گھبرانے کے مشورے دینے والے خود گھبرا گئے ہیں، یہ وہی حکومت ہے جس نے چند ہفتے پہلے ساڑھے 700ارب روپے کا ٹیکس لگایا، اضافی قرضے لے کر یہ پروگرام مکمل کیے جائیں گے، قرضوں سے مہنگائی میں کمی نہیں بلکہ اضافہ ہوگا، موجودہ حکومت نے معیشت کو تباہ کیا، عوام کو کچھ نہیں دیا۔

شاہد خاقان عباسی نے کہا کہ حکومت اپنے آخری دنوں میں عوام کی ہمدردی لینا چاہتی ہے، حکومتی اقدامات سے مہنگائی میں مزید اضافہ ہوگا، وزیراعظم کی تقریرمیں بجٹ کا کوئی ذکر نہیں، پاکستان اضافی قرضے لے کر پیکج کو پورا کرےگا، بتایا جائے آج پیٹرول کی قیمت میں جو کمی کی گئی وہ کیسے پوری کی جائےگی، پاکستان کے لئے مشکلات میں مزید اضافہ ہوگا، مہنگائی کم ہونے کے بجائے مزید بڑھے گی، یہ اگلی حکومت کیلئے مزید مشکلات پیدا کریں گے۔

شاہد خاقان عباسی نے کہا کہ یہ آئی ایم ایف معاہدوں کی بھی نفی کررہے ہیں، ملک میں نئے صاف اور شفاف انتخابات کی ضرورت ہے۔ مزید برآں مسلم لیگ(ن) کی ترجمان مریم اورنگزیب نے کہا کہ عمران صاحب جھوٹ بولنے، سیاسی مخالفین اور میڈیا پہ تہمت و بہتان لگانے، ہتک کرنے سے قومیں آگے نہیں بڑھتیں، عمران صاحب جب آپ آئے تھے تو ملک میں تاریخ کی بلند ترین ترقی کی شرح تھی اور مہنگائی تاریخ کی کم ترین سطح پر تھی، کسی پیکج کی ضرورت نہیں تھی، عمران صاحب سیاسی مخالفین اور میڈیا کا گلا گھونٹنے سے قومیں آگے نہیں بڑھتی، قیامت خیز مہنگائی اور ملک کو غربت اور بے روزگاری کی دلدل میں دھنسا کر پیکج دینے کا نہیں بلکہ آپ کے جانے کا وقت ہے، پہلے دن تو آپ نے پچاس لاکھ گھر، ایک کروڑ نوکری بھی دینے تھے، پہلے دن بھی جھوٹ بولا آج بھی جھوٹ بول رہے ہیں، سب تقاریر پہلے نواز شریف اور شہباز شریف کے خوف میں اور اب تحریکِ عدم اعتماد کے خوف میں ، کیا زندگی ہے عمران صاحب کی، اب کوئی بھی جھوٹا پیکج اور اعلان آپ کو گھر جانے سے نہیں بچا سکتا۔