گھی اور تیل کی قیمت میں اضافے سے پیٹرول کی قیمت میں 10 روپےکی کمی عملاً واپس ہوگئی، شہباز شریف

اسلام آباد(قدرت روزنامہ)مسلم لیگ ن کے صدر اور قائد حزب اختلاف شہباز شریف نےگھی کی قیمتوں میں اضافے کی مذمت کی ہے۔ایک بیان میں شہباز شریف کا کہنا تھا کہ گھی اور خوردنی تیل کی قیمت میں 23 اور 24 روپے اضافے کے بعد پیٹرول کی قیمت میں 10 روپےکی کمی عملاً واپس ہوچکی ہے۔نجی ٹی وی جیو کے مطابق شہباز شریف کا کہنا تھا کہ ایل پی جی اور گیس کی قیمت میں 16 فیصد اضافےکے بعد نام نہاد ریلیف ہوا میں تحلیل ہوچکا ہے۔دوسری جانبپاکستان مسلم لیگ (ن) کے صدر اور قائد حزب اختلاف شہبازشریف نے کہا ہے

کہ حکومت آئی ایم ایف اور عوام دونوں کو دھوکہ دے رہی ہے،دعا ہے عمران نیازی پٹرول اور بجلی کی قیمت میں اپنے پیکج پرآنے والے دنوں میں یوٹرن نہ لیں ۔ اپنے بیان میں شہباز شریف نے کہاکہ آئی ایم ایف کو خوش کرنے کے لئے عوام اور عوام کو خوش کرنے کے لئے آئی ایم ایف کو چکر دیا جارہا ہے ،ڈوبتی سیاست بچانے کے لئے معاشی ،قومی اور عوامی مفادات کو بلی چڑھایا جارہا ہے،پٹرول کی قیمت کم ہوئی ہے تو مہنگائی میں کمی کیوں نہیں ہوئی؟ کرایوں میں کمی کون کرائیگا؟۔ انہوںنے کہاکہ کالی کمائی کرنے والوں پر کرم جبکہ میڈیا اور عوام پر کالے قانون اور سیاہ مہنگائی کا ستم ؟۔ اپوزیشن لڈیر نے کہاکہ یکم جولائی سے سوئی ناردرن کے لئے 94 اور سوئی سدرن کے لئے 50 روپے فی ایم ایم بی ٹی یو اضافہ کا امکان حکومتی پیکج کے کھوکھلے پن کا ثبوت ہے۔ انہوںنے کہاکہ ایل پی جی کی قیمت میں پہلے ہی 27 روپے فی کلو اضافہ اور گھریلو سلنڈر 319 روپے مہنگا ہونا غریبوں سے ریلیف چھیننا ہے ۔ انہوںنے کہا کہ 43 ماہ میں غیرملکی قرض 47.55 ارب ڈالرز سے تجاوز نے معیشت اور معاشی ماہرین کو ہلا کر رکھ دیا ہے ۔ انہوںنے کہاکہ حکومت ہر ماہ بیرون ملک سے ایک ارب ڈالر قرض لے رہی ہے ،تاریخ میں اتنا قرض کسی حکومت نے پاکستانیوں پر نہیں لادا جتنا موجودہ حکومت نے تین سال میں لاد دیا ۔ انہوںنے کہاکہ بینکوں کو آئل درآمد کرنے والی کمپنیوں کو ایل سی کھولنے میں ہچکچاہٹ سے ملک میں تیل کا بحران پیدا ہوسکتا ہے ،ملک میں ڈیزل کے بحران کا خدشہ تشویشناک ہے ، مہنگائی 24 ماہ کی بلند ترین سطح پر پہنچ چکی ہے ۔ انہوںنے کہاکہ کھانے پینے کی اشیاء کی مہنگائی شہروں میں 14.3 اور دیہات میں 14.6 فیصد ہونا عوام پر ظلم کی مثالیں ہیں ،کے الیکٹرک نے 2.90 روپے فی یونٹ اضافہ نام نہاد ریلیف واپس لینے کے مترادف ہے ۔ انہوںنے کہاکہ بجٹ تک پٹرول اور بجلی کی قیمت نہ بڑھانے کا اعلان کرکے پھر بجلی کی قیمت کیوں بڑھائی جارہی ہے؟۔