اپوزیشن کا سوموار کو قومی اسمبلی کا اجلاس بلانے کی ریکوزیشن جمع کرانے پر اتفاق

اسلام آباد (قدرت روزنامہ)اپوزیشن کا سوموار کو قومی اسمبلی کا اجلاس بلانے کی ریکوزیشن جمع کرانے پر اتفاق ہو گیا، اے آر وائے نیوز کے مطابق اپوزیشن نے وزیراعظم کے خلاف تحریک عدم اعتماد پیش کرنے کی تیاری مکمل کرلی ہے،اسی پس منظر میں اپوزیشن قیادت نے قومی اسمبلی کا اجلاس سوموار کو بلانے پر اتفاق کیا ہے، اس کے بعدسپیکر قومی اسمبلی پندرہ دنوں میں اجلاس بلانے کے پابندہوں گے،اسی طرح تحریک عدم اعتماد پر7 دن میں کارروائی کرنا بھی لازمی ہوگا . اس بارے میں کہا گیا ہے کہ وزیراعظم کے خلاف تحریک عدم اعتماد کا اعلان بلاول بھٹو

اسلام آباد میں عوامی مارچ کے شرکاء سے خطاب کرتے ہوئے کریں گے .

دوسری جانب پاکستان پیپلز پارٹی کے مرکزی رہنما خورشید شاہ نے کہا ہے کہ جیسے ہی لانگ مارچ ختم ہوگا عمران خان کے خلاف تحریک عدم اعتماد پیش کردی جائیگی . میڈیا سے غیررسمی گفتگو کرتے ہوئے خورشید شاہ نے کہا کہ ہمارا لانگ مارچ حکومت کے خلاف نہیں بلکہ عمران خان کے خلاف ہے، ہمیں اس شخص سے چھٹکارا چاہیے، خود اسکی پارٹی کے لوگ بھی اس سے پریشان ہیں . پی پی رہنما کا تحریک عدم اعتماد کے حوالے سے کہنا تھا کہ جیسے ہی ہمارا لانگ مارچ ختم ہوگا تو پہلے اسمبلی کا اجلاس بلایا جائیگا اس میں وزیراعظم کیخلاف تحریک عدم اعتماد پیش کی جائیگی اسی دن سے عمران خان کے جانے کی گھڑی چلنا شروع ہوجائیگی . خورشید شاہ نے دعویٰ کیا کہ پی ٹی آئی کے تیرہ اراکین اسمبلی نے سیاسی فیصلہ کرلیا ہے، حکومت کے اتحادی بھی اس کی ناکامی کا بوجھ اپنے کاندھوں پر لینا نہیں چاہتے ہیں . انہوں نے مزید کہا کہ چوہدری پرویز الٰہی کیلیے ان کے دل میں بہت احترام ہے لیکن عمران خان چوہدری برادران کو وزارت اعلیٰ نہیں دے رہا تو اپنی پارٹی کیسے دے گا .