پی ایس پی کا لیاقت آباد میں جلسے کا اعلان

کراچی (قدرت روزنامہ)چیئرمین پاک سر زمین پارٹی مصطفیٰ کمال نے27 مارچ کو لیاقت آباد ٹنکی گراؤنڈ میں جلسہ کرنے کا اعلان کردیا، کہا کہ بلاول بتائیں کیا سندھ میں دودھ کی نہریں بہہ رہی ہیں جو اسلام آباد فتح کرنے گئے ہیں، یہ صرف اقتدار کی لڑائی ہے۔
کراچی میں پریس کانفرنس کرتے ہوئے چیئرمین پی ایس پی مصطفیٰ کمال کا کہنا تھا کہ جنوبی صوبے کی بات کرنے والے ساڑھے تین سال سے اقتدار میں تھے جاتے وقت سب یاد آگیا۔انہوں نے کہا کہ آئین میں ہونا چاہیے جہاں بلدیاتی نمائندے نہ ہوں وہاں قومی اسمبلی کے الیکشنز کروائے جائیں۔
مصطفیٰ کمال نے مزید کہا کہ دو کشتیوں میں سوار ایم کیو ایم کو کوئی پوچھنے والا نہیں، لال بتی کے پیچھے لگا دیا ہے۔چیئرمین پی ایس پی نے کہا کہ ساڑھے تین سال سے حکومت کا ساتھ دینے والی ایم کیو ایم نے عوام کے لئے کچھ مانگنے کی بجائے مانگی بھی تو نائن زیرو کی چابی۔
ان کا کہنا تھا کہ 13 سال سے سندھ میں اقتدار میں رہنے والے اسلام آباد پر یلغار کئے ہوئے ہے جبکہ سندھ میں خاک اڑ رہی ہے۔انہوں نے کہا کہ کراچی کو تھر بنا دیا گیا ہے، کیا سندھ میں دودھ کی نہریں بہہ رہی ہیں جو وفاقی حکومت کو گرانے گئے ہو۔