وزیراعظم نے بابر اعظم کو دلیرانہ اننگز پر مبارکباد دیتے ہوئے سیاسی صورتحال پر بھی دل کی بات کہہ دی

اسلام آباد(قدرت روزنامہ) وزیراعظم عمران خان نے کراچی ٹیسٹ میں قومی ٹیم کے کپتان بابر اعظم کو دلیرانہ اننگز پر مبارکباد دیتے ہوئے سیاسی صورتحال پر بھی دل کی بات کہہ دی۔انہوں نے سماجی رابطے کی ویب سایٹ ٹویٹر پر ٹویٹ کرتے ہوئے کہا کہ ’’ بابر اعظم کو شاندار قائدانہ اننگز اور ورلڈ کلاس بیٹنگ کے ساتھ زبردست فائٹ بیک میں پاکستانی ٹیم کی قیادت کرنے پر مبارک باد، باقی ٹیم اور خاص طور پر رضوان اور شفیق کو بھی مبارکباد کہ جس طرح انہوں نے مقابلہ کیا‘۔

انہوں نے مزید لکھا کہ ’ بدقسمتی سے میں یہ میچ نہیں دیکھ سکا کیونکہ میں میچ فکسنگ کے خلاف ایک اور محاذ پر لڑ رہا ہوں جہاں میرے کھلاڑیوں کو لالچ دینے کے لیے بھاری رقم استعمال کی جا رہی ہے‘۔

۔اس سے قبل پاکستان مسلم لیگ (ق) کے رہنما اور سپیکر پنجاب اسمبلی چودھری پرویز الٰہی نے کہا تھا کہ 10 یا 12 بندے پی ٹی آئی کے ہم سے بھی ملے تھے،ان کا پتا نہیں چل رہا کدھر ہیں، تحریک انصاف کے 10 سے 12 ارکان اپوزیشن کی سیف کسٹڈی میں ہیں۔
جبکہ پاکستان پیپلز پارٹی کے ممبران قومی اسمبلی نے دعویٰ کیا تھا کہ وفاقی حکومت دہشتگردی پر تلی ہے اور اب سندھ ہاؤس اسلام آباد پر حملے کی تیاری کی جارہی ہے۔ پیپلزپارٹی کے اراکین اسمبلی نے حکومت کو خبر دار کیا ہے کہ سندھ ہاؤس میں املاک یا کسی رکن کو نقصان پہنچا تو اس کی ساری ذمہ داری نیازی سرکار پر ہوگی، سندھ ہاؤس پر حملہ آئین اور قانون کی خلاف ورزی ہو گا، اس کا پہلے سے تدارک انتہائی ضروری ہے۔
پاکستان پیپلز پارٹی کے ایم این ایز عبدالقادر پٹیل، آغا رفیع اللہ، جاوید شاہ جیلانی، عبدالقادر مندوخیل، عابد بھائیو، احسان مزاری ، نوید ڈیرو اور مہرین بھٹو نے مشترکہ بیان میں کہا ہے کہ انہوں نے پارلیمنٹ لاجز میں ہونے والی حالیہ دہشتگردی کے بعد حکومت سندھ سے درخواست کی تھی کہ انہیں سندھ ہاؤس میں رہائش دی جائے اور سندھ پولیس کو تعینات کیا جائے۔ انہوں نے اپنے بیان میں کہا کہ ہماری جانیں پارلیمنٹ لاجز میں محفوظ نہیں، یہ ان کا آئینی اور قانونی حق ہے کیونکہ اسلام آباد پولیس گلو بٹ بن چکی ہے۔