وزیراعظم کی 21 مارچ کو قومی اسمبلی اجلاس بلانے کی ہدایت

اسلام آباد(قدرت روزنامہ)وزیراعظم عمران خان سے اسپیکر قومی اسمبلی اسد قیصر نے ملاقات کی ہے۔
اسپیکراسد قیصرکو ترجمانوں کے اجلاس کے دوران بلایا گیا، عمران خان نے21 مارچ قومی اسمبلی کا اجلاس بلانے کی ہدایت کردی۔
اس سے قبل پی ٹی آئی کے33ایم این ایز کی رپورٹ وزیراعظم آفس کو موصول ہوگئی ہے۔ رپورٹ میں ارکان سے اپوزیشن کے رابطوں کا انکشاف ہوا ہے۔
ذرائع کے مطابق پنجاب سے 20ارکان اپوزیشن سے رابطے میں ہیں، کے پی سے7ایم این ایز جبکہ سندھ سے 7 اپوزیشن سے رابطوں کا انکشاف ہوا ہے۔
واضح رہے کہ 8 مارچ کو اپوزیشن ارکان نے اسپیکر آفس میں وزیراعظم کیخلاف تحریک جمع کرائی ہے۔ تحریک قومی اسمبلی کی کل رکنیت کی اکثریت سے منظور ہو جانے پر وزیر اعظم اپنے عہدے پر فائز نہیں رہ سکیں گے۔ اس وقت قومی اسمبلی میں تحریک عدم اعتماد کی کامیابی کے لیے 172 ووٹ درکار ہیں۔
قومی اسمبلی میں حکمران جماعت پی ٹی آئی کو اتحادیوں سمیت 178 اراکین کی حمایت حاصل ہے۔ ان اراکین میں پاکستان تحریک انصاف کے 155 اراکین، ایم کیو ایم کے 7، بی اے پی کے 5، مسلم لیگ ق کے بھی 5 اراکین، جی ڈی اے کے 3 اور عوامی مسلم لیگ کے ایک رکن حکومتی اتحاد کا حصہ ہیں۔
دوسری جانب حزب اختلاف کے کل اراکین کی تعداد 162 ہے۔ ان میں اپوزیشن کی سب سے بڑی جماعت مسلم لیگ ن کے 84، پاکستان پیپلز پارٹی کے 57 اراکین، متحدہ مجلس عمل کے 15، بی این پی کے 4 جبکہ عوامی نیشنل پارٹی کا ایک رکن شامل ہے۔ اس کے علاوہ 2 آزاد اراکین بھی اس اتحاد کا حصہ ہیں۔