وزیراعظم عمران خان اور آرمی چیف کا پشاور کورہیڈکوارٹرز کا دورہ

راولپنڈی (قدرت روزنامہ) وزیراعظم عمران خان اور آرمی چیف جنرل قمر جاوید باجوہ نے پشاور کورہیڈ کوارٹرز کا دورہ کیا، جہاں پر وزیراعظم کو سکیورٹی صورتحال، قبائلی علاقوں میں جاری آپریشن اور پاک افغان بارڈر پر باڑ لگانے سے متعلق بریفنگ دی گئی۔ وزیراعظم کو قبائلی اضلاع میں سماجی و اقتصادی ترقیاتی منصوبوں، انسداد پولیو، انسداد کورونا اور شجرکاری مہم بارے بھی آگاہ کیا گیا۔ پاک فوج کے شعبہ تعلقات عامہ آئی ایس پی آر کے مطابق وزیراعظم عمران خان اور آرمی چیف جنرل قمر جاوید باجوہ نے پشاور کورہیڈ کوارٹرز کا دورہ کیا۔ وزیراعظم نے یادگار شہدا پر حاضری دی اور پھول چڑھائے، وزیراعظم کو سکیورٹی صورتحال، قبائلی علاقوں میں جاری آپریشن اور پاک افغان بارڈر پر باڑ لگانے پر بریفنگ دی گئی۔ وزیراعظم کو قبائلی اضلاع میں جاری سماجی و اقتصادی ترقیاتی منصوبوں بارے بھی آگاہ کیا گیا۔ وزیر اعظم نے علاقہ میں تعمیر و ترقی پر سیکیورٹی اداروں کے کردار کو سراہا۔ وزیر اعظم نے انسداد پولیو، انسداد کورونا اور شجرکاری مہم پر بھی اظہار اطمینان کیا۔ وزیراعظم نے خیبر پختونخوا میں ضم شدہ اضلاع میں ترقیاقی منصوبوں کی تکمیل کی تعریف کی۔