راجا پرویز اشرف سپیکر قومی اسمبلی منتخب

اسلام آباد(قدرت روزنامہ)پیپلز پارٹی کے سینئر رہنما اور سابق وزیر اعظم راجا پرویز اشرف قومی اسمبلی کے سپیکر منتخب ہوگئے،ایاز صادق نے ان سے عہدے کا حلف لیا،اس سے قبل ڈپٹی اسپیکر قومی اسمبلی قاسم سوری نے اپنے عہدے سے استعفی دے دیا۔ذرائع کا بتانا ہے کہ قاسم سوری کا استعفی سیکرٹری قومی اسمبلی کے دفتر کو موصول ہو گیا ہے۔ڈپٹی اسپیکر قومی اسمبلی قاسم سوری نے اپنے استعفے میں لکھا کہ عہدے سے استعفیٰ پارٹی وژن کے مطابق دیا، استعفیٰ پارٹی کی جمہوریت کے ساتھ اس کی وابستگی کی علامت ہے۔قاسم سوری نے اپنے استعفے میں لکھا کہ پاکستان کی

خودمختاری اورسالمیت پرکبھی سمجھوتہ نہیں کریں گے، ملک کی آزادی کے تحفظ کے لیے کسی بھی حد تک جائیں گے۔یاد رہے آج ہونے والے قومی اسمبلی کے اجلاس میں اسپیکر کے حلف کے بعد ڈپٹی اسپیکر قاسم سوری کے خلاف تحریک عدم اعتماد پر ووٹنگ ہونی تھی۔اس سے قبل اسپیکر قومی اسمبلی اسد قیصر بھی اپنے عہدے سے استعفیٰ دے چکے ہیں۔قومی اسمبلی کا اجلاس وزیراعظم شہباز شریف کی جانب سے توجہ دلانے پر آج دوپہر 12 بجے شروع ہوا۔اجلاس مں وزیر اعظم نے بھی شرکت کی اور ایوان سے اظہار خیال کیا۔