حمزہ شہباز کی مشکلات میں مزید اضافہ‘ ایک اور درخواست سماعت کیلئے مقرر کردی گئی

لاہور (قدرت روزنامہ) وزیر اعلیٰ پنجاب حمزہ شہباز کی مشکلات میں مزید اضافہ ہوگیا ہے کیوں کہ لاہور ہائی کورٹ میں ان کے خلاف دائر کردہ ایک اور درخواست سماعت کے لیے مقرر کردی گئی ۔ میڈیا رپورٹس کے مطابق لاہور ہائی کورٹ نے حمزہ شہباز شریف کی وزارت اعلیٰ کا نوٹی فکیشن واپس لینے ، صوبے میں نئے وزیر اعلیٰ کے الیکشن کے اعلان اور اس کے ساتھ تمام ٹرانسفر اور پوسٹنگ واپس لینے کی درخواست سماعت کے لیے منظور کرلی ۔
بتایا گیا ہے کہ منیر احمد کی طرف سے اظہر صدیق ایڈووکیٹ کے توسط سے دائر کی گئی درخواست کو آج ڈائری نمبر الاٹ کردیا گیا ہے اور 23 مئی کو چیف جسٹس لاہور ہائی کورٹ امیر بھٹی اس درخواست پر سماعت کریں گے۔

دوسری طرف وزیر اعلیٰ پنجاب حمزہ شہباز کا کہنا ہے کہ حکومت اپنی آئینی اور قانونی مدت پوری کرے گی ، جب ہم نمبرز دکھائیں گے تو تمام چہ میگوئیاں ختم ہو جائیں گی کیوں کہ ہمارے نمبرز پورے ہیں ، اس لیے تمام افواہیں دم توڑ جائیں گی۔

قبل ازیں مسلم لیگ ق کے رہنما چوہدری مونس الٰہی نے دعویٰ کیا تھا کہ ق لیگ اور تحریک انصاف کے پاس پنجاب اسمبلی میں اکثریت ہے ، پنجاب اسمبلی میں ہمارے پاس 172 اور (ن) لیگ کے پاس 168 ارکان ہیں اس لحاظ سے اکثریت ہمارے پاس ہے ، اگر (ن) لیگ اکثریت کا دعویٰ کر رہی ہے تو حمزہ شہباز کو چیلنچ کرتا ہوں اسمبلی میں اعتماد کا ووٹ لیں۔ خیال رہے کہ گزشتہ روز الیکشن کمیشن آف پاکستان نے پنجاب کے وزیر اعلیٰ کے انتخاب میں حمزہ شہباز کو ووٹ دینے والے پی ٹی آئی کے 25 منحرف اراکین صوبائی اسمبلی کے خلاف ریفرنس منظور کرتے ہوئے انہیں ڈی سیٹ کردیا تھا ، الیکشن کمیشن کی جانب سے پنجاب اسمبلی کے 25 اراکین کو ڈی سیٹ کیے جانے کے بعد حمزہ شہباز بطور وزیر اعلیٰ پنجاب اکثریت کھو بیٹھے ۔
اسپیکر پنجاب اسمبلی چوہدری کی طرف سے بھیجے گئے ریفرنس پر الیکشن کمیشن کے فیصلے کے تحت پنجاب اسمبلی کی رکنیت سے فارغ ہونے والوں میں جہانگیر ترین گروپ کے 18 ، علیم خان گروپ کے 5 اور اسد کھوکھر گروپ کے 2 اراکین شامل ہیں ، الیکشن کمیشن کے فیصلے کی روشنی میں ڈی سیٹ ہونے والوں میں پی پی217 ملتان 7 سے محمد سلمان نعیم ، پی پی288 ڈی جی خان 2 سےمحسن عطاخان کھوسہ ، پی پی90بھکر2سے سعید اختر خان ، پی پی97فیصل آبادایک سے محمد اجمل اور پی پی125جھنگ 2 سے فیصل حیات شامل ہیں۔
اس کے علاوہ پی پی 7 راولپنڈی 2 سے راجہ صغیر احمد ، پی پی 83خوشاب سےملک غلام رسول ، پی پی90بھکرسے سعیداکبرخان نوانی ، پی پی127جھنگ سے مہر محمد اسلم ، پی پی140شیخوپورہ سے میاں خالد محمود ، پی پی202ساہیوال سےملک نعمان لنگڑیال اور پی پی158لاہور سے عبدالعلیم خان ، پی پی 224 لودھراں سے زوار حسین وڑائچ ، پی پی228لودھراں سےنذیر احمد خان ڈی سیٹ ہوئے ہیں۔
اسی طرح الیکشن کمیشن نے اپنے فیصلے میں پی پی237بہاولنگر سےفداحسین ، پی پی273مظفرگڑھ سے محمد سبطین رضا ، مخصوص نشست پی پی322 سے عائشہ نواز ، مخصوص نشست پی پی327 سے ساجدہ یوسف ، مخصوص نشست پی پی364 سے ہارون عمران گل اور مخصوص نشست پی پی311 سے عظمیٰ کاردار ، پی پی167لاہور سے نذیراحمدچوہان ، پی پی170 سے محمد امین ذوالقرنین ، پی پی272 سے زہرا بتول ، پی پی168 سے ملک اسد علی ، پی پی356 سے اعجاز مہیش ، پی پی287 سے جاویداختر کو بھی ڈی سیٹ کردیا۔