چین کیساتھ مضبوط تعلقات، سی پیک سے ترقی کی نئی راہیں کھلیں گی : بلاول بھٹو

اسلام آباد(قدرت روزنامہ) وزیرخارجہ بلاول بھٹو زرداری نے کہا ہے کہ سی پیک سے خطےمیں ترقی کی نئی راہیں کھلیں گی،ہمارے چین کیساتھ بہت مضبوط تعلقات ہیں۔
اسلام آباد میں وزیر خارجہ بلاول بھٹو نے آئی ایس ایس آئی کی تقریب سے خطاب کرتے ہوئے کہا ہے کہ ابھی بھی پاکستان عالمی طاقتوں کے مابین ایک پل کا کردار ادا کر سکتا ہے، پاکستان ماضی میں امریکا اور چین کے درمیان سفارتی تعلقات کے قیام میں اہم کردار ادا کر چکا ہے۔
انہوں نے کہا کہ اقتصادی، سفارتی سطح پرہمارے پاس پوٹیشنل موجود ہے، پاکستان کی خارجہ پالیسی جیو پولیٹیکل اثرات سےبراہ راست متاثر ہو رہی ہے، خارجہ پالیسی کا براہ راست اثر ہر پاکستانی پرمرتب ہوتا ہے، ہم نے بطور قوم و ملت پاکستان کوبہترین پوزیشن میں لانا ہے۔
بلاول بھٹو نے مزید کہا کہ ہمیں اپنے جغرافیائی مقام کو استعمال کر کے اچھے مواقع تلاش کرنا ہوں گے، ہم پاکستان کو مستقبل میں اعلیٰ مقام دلانے کیلئے کوشاں ہیں، پاکستان ایسے خطے میں ہے کہ جہاں دنیا میں ہونیوالی تبدیلیاں براہ راست اثر انداز ہوتی ہیں۔
وزیر خارجہ کا کہنا تھا کہ ہمیں یہ سوچنےکی ضرورت ہے کہ ہم اس وقت کہاں کھڑے ہیں، نوجوانوں کو مثبت سرگرمیوں میں مصروف رکھنے کیلئے کام کر رہے ہیں، ہمیں اپنےنوجوانوں کیلئےترقی کے مواقع پیدا کرنے کی ضرورت ہے، ہمارے لوگوں میں اتنی صلاحیت ہے کہ دنیا میں کہیں بھی کام کر سکتے ہیں۔