سعودی عرب نے پاکستان سے تجارت، ترقی اور سرمایہ کاری بارے اہم اعلان کر دیا

اسلام آباد(قدرت روزنامہ) وزیراعظم شہباز شریف نے کہا ہے کہ پاکستان اور سعودی عرب کے تاریخی برادرانہ تعلقات ہیں ،علاقائی اور بین الاقوامی سطح پر باہمی دلچسپی کے تمام امور پر دونوں ممالک کا موقف مشترک ہے،روڈ ٹو مکہ اقدام مستقبل میں پاکستان کے دیگر

شہروں تک پھیلایا جائے گا . وزیر اعظم محمد شہباز شریف سے سعودی عرب کے سفیر نواف بن سعید احمد المالکی کی قیادت میں روڈ ٹو مکہ پراجیکٹ ٹیم نے ملاقات کی جس میں جنرل ڈائریکٹوریٹ آف پاسپورٹ کے سعودی محکمہ سے منصور شاہد ایس الطائیبی بھی موجود تھے .

سعودی وفد کا خیرمقدم کرتے ہوئے وزیراعظم نے اس بات کا اعادہ کیا کہ پاکستان اور سعودی عرب کے تاریخی برادرانہ تعلقات ہیں . انہوںنے کہاکہ علاقائی اور بین الاقوامی سطح پر باہمی دلچسپی کے تمام امور پر دونوں ممالک کا موقف مشترک ہے . وزیر اعظم نے کہا کہ دونوں ممالک وقت کے نشیب و فراز میں ایک دوسرے کے ساتھ کھڑے ہیں . وزیراعظم نے روڈ ٹو مکہ منصوبے پر سعودی قیادت کا شکریہ ادا کیا . وزیر اعظم نے کہاکہ اس اقدام کے تحت ہزاروں پاکستانی عازمین حج کو سہولتیں فراہم کی جائیں گی . وزیر اعظم نے کہاکہ روڈ ٹو مکہ اقدام مستقبل میں پاکستان کے دیگر شہروں تک پھیلایا جائے گا . سعودی سفیر نے دونوں ممالک کے درمیان تجارت، ترقی اور سرمایہ کاری کے شعبوں میں دوطرفہ تعاون کو مزید مضبوط بنانے کی خواہش کا اظہار کیا . سعودی سفیرنے کہاکہ روڈ ٹو مکہ اقدام کا مقصد سعودی امیگریشن اور کسٹم سے متعلق رسمی کارروائیوں کو حج کے لیے اسلام آباد انٹرنیشنل ایئرپورٹ پر روانگی سے قبل مکمل کرنا ہے . سعودی سفیر نے کہاکہ سعودی ٹیم ایسے عازمین کی مملکت روانگی سے قبل ان کی سہولت کے لیے پاکستان میں موجود ہے .