عالمی منڈی میں تیل نمایاں سستا ہوگیا

اسلام آباد (قدرت روزنامہ) عالمی منڈی میں تیل نمایاں سستا ہوگیا۔امریکی صدر جو بائیڈن کی جانب سے ایندھن پر عائد ٹیکس میں تین ماہ کے لیے استثنیٰ دینے کی خبر آتے ہی عالمی منڈی میں خام تیل کی قیمتوں میں کمی ہوگئی ہے۔میڈیا رپورٹس کے مطابق فوج کو عالمی منڈی میں برطانوی برینٹ کروڈ آئل کی قیمت تقریبا 6.5 فیصد یعنی 7.49 ڈالر فی بیرل کم ہو کر 107.16 ڈالر ہو گئی ۔
اس کے علاوہ امریکی خام تیل ویسٹ ٹیکساس انٹرمیڈیٹ کی قیمت 7.1 فیصد یعنی کہ 7.74 ڈالر کم ہو کر 101.78 ڈالر فی بیرل پر آگئی ۔ معاشی تجزیہ کاروں کے مطابق عالمی معیشت میں سست روی کے باعث خام تیل کی طلب میں کمی ہوئی ہے، اسی باعث تیل کی قیمتوں میں کمی کا رجحان دیکھنے میں آ رہا ہے۔ اس حوالے سے پاکستانی معاشی ماہرین کا کہنا ہے کہ اگر عالمی مارکیٹ میں خام تیل کی قیمتوں میں کمی کا رجحان برقرار رہا تو یہ پاکستان کیلئے بہت فائدہ مند ہو گا۔

یہاں واضح رہے کہ پاکستان برطانوی خام تیل کا خریدار ہے۔ گزشتہ ہفتے تک عالمی مارکیٹ میں برطانوی خام تیل کی فی بیرل قیمت 120 ڈالر کی سطح پر موجود تھی۔ تاہم امریکا اور دیگر کئی مغربی ممالک کی جانب سے شرح سود میں غیر معمولی اضافہ کیے جانے کے بعد عالمی مارکیٹ میں اثرات پڑنے لگے۔ عالمی معیشت میں سست روی آنے کی اطلاعات پر تیل کی عالمی مارکیٹ پر بھی اثر پڑا اور چند روز کے دوران ہی برطانوی خام تیل کی فی بیرل قیمت میں 10 ڈالرز تک کی کمی ہو چکی ہے۔
عالمی مارکیٹ میں تیل کی قیمتوں میں کمی کے حوالے سے پاکستان کے وزیر خزانہ مفتاح اسماعیل کی جانب سے بھی ردعمل دیا گیا۔ جیو نیوز سے گفتگو کرتے ہوئے وفاقی وزیر خزانہ نے کہا کہ امید ہے کہ عالمی مارکیٹ میں خام تیل کی قیمتوں میں کمی آئے گی، ایسا ہونے پر پاکستان بھی صورتحال کا فائدہ اٹھائے گا۔