پاکستان: کورونا وائرس سے 1 دن میں ریکارڈ 102 اموات

(قدرت روزنامہ)سماجی فاصلے، ماسک کو نظر انداز کرنے اور ایس او پیز کی خلاف ورزیوں کے باعث پاکستان میں کورونا وائرس کی چوتھی لہر زور پکڑنے لگی، ملک کورونا مریضوں کے حوالے سے مرتب کی گئی فہرست میں 31 ویں نمبر پر پہنچ چکا ہے۔

نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق پاکستان میں گزشتہ 24 گھنٹوں کے دوران کورونا وائرس کے مزید 4 ہزار 934 کیسز سامنے آئے ہیں، مزید 102 افراد اس موذی وباء کے سامنے زندگی کی بازی ہار گئے، اس کے مزید 3 ہزار 376 مریض شفایاب ہو گئے، جبکہ مثبت کیسز کی شرح 8 اعشاریہ 30 فیصد ہو گئی۔

پاکستان بھر میں کورونا وائرس کے اب تک 24 ہزار 187 مریض انتقال کر چکے ہیں جبکہ اس موذی وائرس کے کُل مریضوں کی تعداد 10 لاکھ 85 ہزار 294 ہو چکی ہے۔

ملک بھر میں اسپتالوں، قرنطینہ سینٹرز، وینٹی لیٹرز اور گھروں میں کورونا وائرس کے 85 ہزار 633 مریض زیرِ علاج ہیں، جن میں سے 4 ہزار 584 مریضوں کی حالت تشویش ناک ہے، جبکہ 9 لاکھ 75 ہزار 474 مریض اب تک اس بیماری سے شفایاب ہو چکے ہیں۔

پاکستان: کورونا کیسز 10 لاکھ 80 ہزار، مزید 81 اموات

گزشتہ 24 گھنٹوں میں ملک میں کورونا وائرس کے مزید 59 ہزار 397 ٹیسٹ کیئے گئے، جبکہ اب تک کُل 1 کروڑ 66 لاکھ 75 ہزار 527 کورونا ٹیسٹ کیئے جا چکے ہیں۔

پاکستان بھر میں گزشتہ 24 گھنٹوں کے دوران 9 لاکھ 89 ہزار 448 افراد کو کورونا وائرس کی ویکسین دی گئی، جبکہ اب تک کُل 3 کروڑ 97 لاکھ 12 ہزار 7 کورونا ویکسین کی خوراکیں دی جا چکی ہیں۔

سندھ میں کورونا وائرس کے مریضوں کی تعداد ایک بار پھر دیگر صوبوں سے زیادہ 4 لاکھ 6 ہزار 109 ہو چکی ہے، جبکہ اس سے کُل اموات 6 ہزار 316 ہو گئیں۔

پنجاب میں کورونا وائرس کے اب تک 3 لاکھ 68 ہزار 195 مریض رپورٹ ہوئے ہیں، جبکہ یہاں کُل ہلاکتیں دیگر صوبوں سے زیادہ ہیں جو 11 ہزار 292 ہو چکی ہیں۔

خیبر پختون خوا میں کورونا وائرس کے مریضوں کی تعداد 1 لاکھ 50 ہزار 26 ہو چکی ہے، جبکہ اس سے یہاں کُل اموات 4 ہزار 604 ہو گئیں۔

دنیا: کورونا وائرس سے اموات 43 لاکھ 27 ہزار سے متجاوز

وفاقی دارالحکومت اسلام آباد میں 92 ہزار 233 کورونا وائرس سے متاثرہ مریض اب تک سامنے آئے ہیں، جبکہ اب تک یہاں کُل 824 افراد اس وباء سے جان کی بازی ہار چکے ہیں۔

کورونا وائرس کے بلوچستان میں 31 ہزار 341 مریض اب تک رپورٹ ہوئے ہیں جہاں 332 افراد اس مرض سے انتقال کر چکے ہیں۔

آزاد جموں و کشمیر میں کورونا وائرس کے اب تک 28 ہزار 347 مریض رپورٹ ہوئے ہیں، جبکہ اس کے باعث اب تک یہاں کُل 658 مریض وفات پا چکے ہیں۔

گِلگت بلتستان میں 9 ہزار 43 کورونا وائرس کے مریض سامنے آئے ہیں جبکہ اس سے اب تک 161 افراد جاں بحق ہوئے ہیں۔