آخر ان لوگوں کا مسئلہ کیا ہے؟ جمائما ن لیگی حامیوں پر برس پڑیں

اسلام آباد (قدرت روزنامہ)سابق وزیراعظم اور پی ٹی آئی کے چئیر مین عمران خان کی سابقہ اہلیہ جمائما گولڈ اسمتھ نے پاکستان مسلم لیگ ن کی جانب سے اپنی والدہ کی رہائش گاہ کے باہراحتجاج کے اعلان پرغم وغصے کا اظہارکیا ہے۔
اسی حوالے سے جمائما نے سماجی رابطے کی ویب سائٹ ٹوئٹر پر جاری اپنی ٹوئٹ میں لکھا، ’آخران لوگوں کا مسئلہ کیا ہے؟ رواں ہفتے کے اختتام پرمیری 88 سالہ والدہ کے گھرکے باہر ایک اور احتجاج کا اعلان کیا گیا ہے اور یہ تیسری بار ہے‘۔

انہوں نے اپنی ٹوئٹ میں سوال بھی کیاکہ آخران کی والدہ کا پاکستانی سیاست سے کیالینا دینا ہے، یہ ان کے لیے پریشان کن اور پولیس کے وقت کا بھی مکمل ضیاع ہے۔
واضح رہےکہ یہ پہلی بار نہیں ہو رہا بلکہ اس سے قبل رواں سال اپریل میں بھی عمران خان کی حکومت کے خاتمے کے بعد ن لیگ کے حامیوں نے لندن میں نواز شریف کی رہائش گاہ کے باہر پی ٹی آئی کے مظاہروں کے جواب میں جمائما کی والدہ کی رہائش گاہ کے باہراحتجاجی مظاہرہ کیا تھا۔
اس مو قع پر بھی جمائما نے ٹوئٹرپرویڈیو شیئرکی تھی جس میں ایک شخص انہیں دھمکی دے رہا ہے کہ اگر پی ٹی آئی کے حامیوں نے ن لیگی قیادت کے گھرکے باہر احتجاج کرنا بند نہ کیا تو وہ ان کے گھر کے بیڈ رومزمیں گھس جائیں گے۔