فتنہ خان پاکستان کو آئی ایم ایف کے پاس گروی رکھ گیا ،کرسی کیا گئی اس کا دماغی توازن ہل گیا،17جولائی کو پنجاب عمران خان کی سیاست کا صفایاکردے گا،مریم نواز کا خطاب

لاہور (قدرت روزنامہ)پاکستان مسلم لیگ (ن) کی نائب صدر مریم نواز نے کہا ہے کہ فتنہ خان پاکستان کو آئی ایم ایف کے پاس گروی رکھ گیا ، خدا کی قسم کھا کر کہتی ہوں اگر پاکستان کے دیوالیہ ہونے کا خطرہ نہ ہوتا تو ہم مر جاتے پیٹرولیم کی قیمتیں کبھی نہ بڑھاتے ،اس کی کرسی ہل گئی لیکن کرسی سے زیادہ دماغ ہل گیا ، کرسی کیا گئی دماغی توازن ہل گیا ، کبھی کہتا ہے نیوٹرل کو نیوٹرل ہونا چاہیے ، کبھی کہتا ہے مداخلت کیوں نہیں کرتے،75سالوں میں پہلا سیاستدان دیکھا ہے جو نیوٹرل کو آوازیں دیتا ہے کہ خدا کا واسطہ ہے مجھے دوبارہ اقتدار میں لائو ، شاید پہلا آدمی تھا جس کو نیوٹرل نے انگلی پکڑ کر چلایا ، اب آوازیں دے رہا ہے کہ مجھے اقتدار کی سیڑھی تک پہنچائو ،چار سال تک اسے بیساکھیوں پر چلنے کی عادت پڑ گئی تھی اور جب بیساکھیاں گئیں تو دھڑام سے منہ کے بل جا گرا ہے ،حمزہ شہباز آج پنجاب کے لئے بڑے ریلیف پیکج کا اعلان کریں گے ،پنجاب کے عوام جان گئے ہیں کہ اگر ان کی ترقی کا کوئی دشمن ہے تو اس کا نام عمران خان ہے وہ کیوں عمران خان کو ووٹ دیں گے۔

ضمنی حلقہ پی پی 158کی انتخابی مہم کے سلسلہ میں دھرمپورہ میں جلسے سے خطاب کرتے ہوئے مریم نواز نے کہا کہ آج دھرمپورہ میں جلسہ نہیں لگ رہا بلکہ پورے لاہور کا جلسہ لگ رہا ہے ۔ رانا احسن شرافت کو اللہ تعالی نے فتح عطا فرما دی ہے۔ انہوں نے کہا کہ مجھے دل سے اعتراف ہے کہ ہمیں پیٹرول اورڈیزل کی قیمتیں بڑھانی پڑیں اور دل پر پتھر رکھ کر بڑھانی پڑیں ، قیمتیں بڑھانے کے بعد ہم گھروں میں چھپ کر نہیں بیٹھے اور نواز شریف نے کہا کہ بیٹی لوگوں میں جائو اور انہیں بتائو مجھے ان کی تکلیف کا احساس ہے ۔
آپ سب جانتے ہیں آئی ایم ایف کا وہ معاہدہ جس کی وجہ سے قیمتیں بڑھانی پڑی وہ معاہدہ کس کا کیا ہوا ہے ، جہاں قیمتیں بڑھنے کا دکھ ہے وہاں اس بات کی تسلی ہے کہ پاکستان کے عوام یہ جانتے ہیں کہ یہ قیمتیں کیوں بڑھانی پڑیں اور کس کی وجہ سے بڑھانی پڑیں ۔ انہوں نے کہا کہ گو نیازی گو تو کب کا ہو گیا ہے اب تو ہر جگہ روتا پھر رہا ہے ۔ انہوں نے کہا کہ فتنہ خان پاکستان کو آئی ایم ایف کے پاس گروی رکھ گیا ، خدا کی قسم کھا کر کہتی ہوں اگر پاکستان کے دیوالیہ ہونے کا خطرہ نہ ہوتا تو ہم مر جاتے یہ قیمتیں کبھی نہ بڑھاتے ۔
میں یہ بھی نہیں کہوں گی امریکہ اور برطانیہ میں مہنگائی ہے ، عوام دو سے ایک روٹی کر دیں ، میں یہ چاہتی ہوں کہ عوام تین وقت کا کھانا پیٹ بھر کر کھائیں اوربھروسہ رکھنا وہ وقت ضرور آ ئے گا۔ جن تکلیفوں سے آج آپ کو گزرنا پڑ رہا ہے ہم اپنی جان لڑا دیں گے لیکن ان تکلیفوں سے نجات دلاکر رہیں گے۔ میں فتنہ خان کی طرح یہ نہیں کہوں گی کہ گھبرانا نہیں ہے اور یہ بھی نہیں کہ چھپ جائوں ، میں کہوں گی گھبرانا نہیں ہے ان شا اللہ آپ کے یہ خادم دن رات محنت کر کے آپ کی مشکلات کو آسان بنائیں گے۔
انہوں نے کہا کہ جب 2013 میں ہماری حکومت آئی تو 20گھنٹے کی لود شیڈنگ تھی یا نہیں تھی ، کیا نواز شریف نے 2018 اپنی حکومت جانے سے پہلے لو ڈشیڈنگ صفر پر لا کر دکھائی یا نہیں دکھائی ، چار سال بعد اس فتنہ خان کی نالائقی اور نا اہلی کے بعد شہباز شریف کو حکومت ملی تو دس ، دس گھنٹے کی لوڈ شیڈنگ واپس آ گئی ہے ،اگر ہم بیس گھنٹے کی لوڈ شیڈنگ کو صفر پر لا سکتے ہیں تو اس بار بھی لوڈ شیڈنگ کو صفر پر لائیں گے ، مہنگائی بھی کم ہو گی ،میں نے شہباز شریف کے سٹاف سے سے پوچھا کہ شہباز شریف کس وقت اٹھ کر کام کرتے ہیں تو انہوں نے بتایا کہ وہ تہجد کے وقت اٹھتے ہیں ایکسر سائز کرتے ہیں فجر کی نماز پڑھ کر عوام کی خدمت میں حاضر ہو جاتے ہیں، جو شخص عوام کا مینڈیٹ ہتھیا کر وزیر اعظم بنا اس کا دن بارہ بجے سے پہلے شروع نہیں ہوتا تھا ، اس کی سستی اورنا اہلی کی وجہ سے پاکستان کے عوام آج مشکلات کا شکار ہیں ۔
انہوں نے کہا کہ نواز شریف اور شہباز شریف کے میگا پراجیکٹ تھے ،سی پیک ، بجلی کے کارخانے ، موٹر وے، میٹرو ، اورنج لائن ،سڑکوں کا جال ، ترقی کا جال اور فتنہ خان جو آج پھر پنجاب پر نظر لگا کر بیٹھا ہے اس کے میگا پراجیکٹ فرح گوگی ،پنکی پیرنی اور کرپشن کی وہ ٹرین تھی جو جو لاہور سے چلتی تھی اور سیدھی بنی گالہ جاتی تھی ۔ اس مشکل دور میں جبکہ خزانہ خالی ہے شہباز شریف نے سختی سے ہدایت کی ہے کہ یوٹیلٹی سٹورز پر اشیائے خوردونوش سستی فراہم کی جائیں،غریب کا چولہا نہیں بجھنا چاہیے ،ایک خوشخبری سنا دو ں شہباز شریف نے وعدہ کیا ہے جب بھی بین الاقوامی مارکیٹ میں پیٹرولیم کی قیمتیں ایک ڈالر بھی نیچے آئیں گی میں اسی دن اپنے عوام کو ریلیف دوں گا، حمزہ شہباز بھی آج پنجاب کی تاریخ کا سب سے بڑا ریلیف پیکج کااعلان کریں گے۔
انہوں نے کہا کہ آج فتنہ خان کی تقریر سنو بات ایسے کرتا ہے کہ میں اتنے بیگاڑ پیدا کر کے گیا ہوں میں دیکھتا ہوں کیسے ٹھیک کرتے ہیں تمہارا چیلنج شہباز شریف نے قبول کیا ہے اور ان شا اللہ تمہیں سب ٹھیک کر کے دکھائیں گے،فتنہ خان نے جتنی کوشش کی ،بار بار احتجاج اور جلسے کی کالیں دیتا رہا لیکن کوئی اس میں شامل نہیں ہوا ، خیبر پختوانخواہ کے جتنے لوگ بنی گالہ کے باہر احتجاج کرتے ہیں یہ تعداد اس کے احتجاج سے کہیں زیادہ ہوتی ہے ،مہنگائی لانے والے کا نام عمران خان ہے۔
انہوں نے کہا کہ فتنہ خان روز آ جاتا ہے تقریر کرنے ،کرسی ہل گئی کرسی سے زیادہ دماغ ہل گیا ، کرسی کیا گئی دماغی توازن ہل گیا ، کبھی کہتا ہے نیوٹرل کو نیوٹرل ہونا چاہیے ، کبھی کہتا ہے مداخلت کیوں نہیں کرتے،75سالوں میں پہلا سیاستدان دیکھا ہے جو نیوٹرل کو آوازیں دیتا ہے کہ خدا کا واسطہ ہے مجھے دوبارہ اقتدار میں لائو ،پاکستان نے پہلی مرتبہ ایسا سیاستدان دیکھا ہے جو جلسوں میں کھڑے ہو کر دوہائیاں دیتا ہے مجھے کیوں نکالا ،نیوٹرلز مجھے اقتدار میں لے کر آئو ۔
یہ اتنا احسان فراموش ہے ،شاید پہلا آدمی تھا جس کو نیوٹرل نے انگلی پکڑ کر چلایا اس کا اپنا پرویز الہی کہتا تھا کہ وہ اس کی نیپی تک بدلتے تھے، اب آوازیں دے رہا ہے کہ مجھے اقتدار کی سیڑھی تک پہنچائو ،چار سال تک اسے بیساکھیوں پر چلنے کی عادت پڑ گئی تھی اور جب بیساکھیاں چلی گئیں تو دھڑام سے منہ کے بل گر ا ہے ۔ انہوں نے کہا کہ فتنہ خان جانتا ہے کہ لوگ اسے جان گئے ہیں اب ووٹ نہیں ملے گا تو ادھر ادھر آوازیں دے رہا ہے ۔
رات کو اس کی بیوی سوشل میڈیا کے لوگوں کو کہتی ہے اداروں کے خلاف ٹرینڈ چلائو ،میری چوری کا پوچھے ، مانیکا کے بچوں کا کوئی پوچھے تو غداری کا ٹرینڈ چلا دو ،عوام غریب ہو گئی لیکن فرح گوگی ، عمران خان کے سوتیلے بچے امیر ہو گئے ، لوگوں کو تکلیف دی اپنو ں کو ریلیف دیا ، پنکی پیرنی کہتی ہے کہ کرپشن اور نا اہلی کا کوئی سوال پوچھے تو ایک ہی جواب دینا غداری ہو گئی سازش ہو گئی ۔
انہوں نے کہا کہ عمران خان سے بڑا پنجاب دشمن اور کوئی نہیں ہے ، جب شہباز شریف وزیر اعلی تھا پانچ بجے میٹرو بس منصوبے اور کبھی اورنج لائن منصوبے پر پہنچا ہوتا تھا،پچھلے چار سال میں اتنی غفلت اور بے حسی برتی گئی کہ لاہور میں کوڑے کے ڈھیرلگ گئے ۔انہوں نے کہا کہ تاریخ کا سب سے بڑا ڈاکہ فتنہ خان نے پنجاب کے عوام کے سارے وسائل پر ڈالا ہے ، ہمیں تو اب پتہ چلا ہے کہ بارہ کروڑ لوگوں کے صوبے کی وزیر اعلی فرح گوگی ہے جس کے تانہ بانے پنکی پیرنی سے ملتے ہیں۔