وزیراعظم کے زیر صدارت اجلاس میں پنجاب کابینہ سے متعلق بڑا فیصلہ

لاہور(قدرت روزنامہ)وزیراعظم شہباز شریف کی زیرصدارت پارٹی کے مرکزی رہنماؤں کا اہم مشاورتی اجلاس ماڈل ٹاؤن میں منعقد ہوا جس میں وزیر اعلیٰ کے انتخاب کے حوالے سے سپریم کورٹ میں زیر سماعت مقدمے،پنجاب کابینہ کی تشکیل سمیت پارٹی امور

اور آئندہ کی حکمت عملی کے حوالے سے تبادلہ خیال کیا گیا . اجلاس میں وزیراعلی پنجاب حمزہ شہباز، وفاقی وزرا ء خواجہ سعدرفیق، رانا ثنااللہ، اعظم نذیر تارڑ،سردار ایاز صادق، ملک احمد خان، عطا اللہ تارڑ سمیت دیگر شریک ہوئے .

اعظم نذیر تارڑ اور رانا ثنا اللہ خان نے وزیر اعلیٰ کے انتخاب کے حوالے سے سپریم کورٹ میں زیر سماعت مقدمے کے حوالے سے بریفنگ دی . شرکاء نے مطالبہ کیا کہ تریسٹھ اے کی تشریح انتہائی اہمیت کا حامل معاملہ ہے اس لئے معزز عدالت کو اس حوالے سے فل کورٹ تشکیل دینا چاہیے . رانا ثنا اللہ اور اعظم نذیر تارڑ نے شرکاء کو زیر سماعت مقدمے کے مختلف پہلوؤں پر بھی تفصیلی آگاہی دی . اجلاس میں مختلف مراحل میں پنجاب کابینہ کی تشکیل کے حوالے سے بھی مشاورت کی گئی . ذرائع کے مطابق اجلاس میں موجودہ سیاسی صورتحال پر بھی تبادلہ خیال اور اس تناظر میں آئندہ کی حکمت عملی بارے بھی گفتگو کی گئی . پارٹی ذرائع کے مطابق اجلاس میں فیصلہ کیا گیا کہ پنجاب کابینہ فوری طور پر تشکیل دی جائے، پارٹی ذرائع کے مطابق ممکنہ وزراء میں میاں مجتبیٰ، شجاع الرحمان، بلال یاسین، خواجہ عمران نذیر، محمد منشاء اللہ بٹ، خواجہ سلمان رفیق، ملک احمد خان اور سردار اویس لغاری شامل ہوں گے . پارٹی ذرائع کے مطابق پیپلز پارٹی کے تین اور آزاد ارکان کو بھی کابینہ میں شامل کئے جانے کا قوی امکان ہے .